اسلام آباد۔2مارچ(اے پی پی) پاکستان مسلم لیگ (ن) دی نویں وزیر مملکت تے رکن قومی اسمبلی ڈاکٹر شزرا منصب علی خان کھرل قوم کوں رمضان المبارک دے مقدس مہینے دی مبارخ ݙیندے آکھیے سیاسی جماعتاں وچال اتحاد دی لوڑھ اے۔ نجی ٹی وی نال خصوصی ڳالھ مہاڑ کریندے انہاں پاکستان دی ساری سیاسی جماعتاں وچال اتحاد دی لوڑھ تے زور ݙیندے آکھیے انہاں کوں عدم برداشت کوں برقرار رکھݨ دے بجائے ملک دی ترقی سانڳے رل تے کم کرݨا چاہیدے ۔ انہاں مسلماناں اچ رواداری تے مہذب زبان کوں ودھارا ݙیوݨ دی اہمیت تے زور ݙتا تے آکھیے آندیاں نسلاں دے روشن مستقبل سانڳے اے ٻہوں ضروری اے ۔وزیر مملکت نے وزیراعظم شہباز شریف تے انہاں دی ٹیم دی پاکستان دی معیشت کوں مستحکم کرݨ تے ڈیفالٹ توں بچاوݨ دیاں کوششاں دی تعریف کیتی ، انہاں آکھیے سیاسی جماعتاں دا بنیادی مقصد قوم دی خدمت ہووݨا چاہیدے ، عوام دی فلاح و بہبود سانڳے رل تے کم کرݨا چاہیدے ، انہاں وزیر اعظم شہباز شریف دی قیادت اچ پاکستان دی ترقی تے اعتماد کریندے آکھیے حوصلہ افزا معاشی اشارییں نال ملک سدھے پاسے ٹردا پئے، معاشی استحکام گھنݨ ٻہوں ضروری اے تے حکومت کوں ایں سلسلے اچ آپݨے اہداف کوں کامیابی نال پورا کریندے ݙیکھݨ چنڳی ڳالھ اے۔
