اسلام آباد۔3مارچ (اے پی پی) وزیراعظم دی موسمیاتی معاون رومینہ خورشید عالم نال بین الاقوامی مالیاتی کارپوریشن (آئی ایف سی) دے گلوبل ڈائریکٹر برائے موسمیات جیمی فرگسن دی قیادت اچ چار رکنی وفد سنوار کوں ملاقات کیتی۔ ملاقات اچ آئی ایف سی اتے وزارت موسمیاتی تبدیلی وچال سانجھے داری کوں مضبوط ٻݨاوݨ اتے مختلف شعبیاں اچ موسمیاتی تبدیلی دے اثرات نال نبڑݨ کیتے سٹیک ہولڈرز دی صلاحیتاں کوں ودھاوݨ تے ڳالھ کیتی ڳئی۔وفد پاکستان دی موسمیاتی تبدیلی نال نبڑݨ دی صلاحیت اچ بہتری کیتے حکمت عملی تے ڳالھ کیتی اتے ترقی پذیر ملکاں کیتے عالمی حمایت دے تسلسل دی اہمیت کوں اجاگر کیتا۔ رومینہ خورشید عالم اتے جیمی فرگسن موسمیاتی تبدیلی نال موثر طریقے نال نبڑݨ کیتے ماہرین ماحولیات، تعلیمی اداریاں اتے تکنیکی ماہرین سویں اہم سٹیک ہولڈرز کوں مضبوط سانجھے داری نال انہاں دی صلاحیتاں کوں ودھاوݨ دی لوڑھ تے زور ݙتا۔ رومینہ خورشید عالم ترقی پذیر ملکاں کیتے موسمیاتی فنڈنگ تئیں سوکھی رسائی دی اہمیت کوں اجاگر کریندیں ہوئیں آکھیا جو پاکستان دا عالمی سطح تے گرین ہاؤس گیساں دے اخراج اچ ڳھٹ حصہ اے پر اےموسمیاتی تبدیلی دے تباہ کن اثرات جینویں سیلاب، خشک سالی اتے شدت دی گرمی دا ساریاں توں ودھ شکار اے۔ انہاں موسمیاتی فنانس تئیں سوکھی رسائی تے زور ݙتا۔
