اسلام آباد۔3اپریل(اے پی پی)حکومت پاکستان مقبوضہ فلسطینی علاقے بالخصوص غزہ اچ اسرائیلی قابض افواج دی طرفوں جاری جارحیت اتے ظلم دی شدید ترین الفاظ اچ مذمت کیتی اے ۔ ترجمان دفتر خارجہ توں جاری بیان اچ آکھیا ڳئے اندھا دھند تشدد ہزاراں بے گناہ فلسطینیاں دیاں جاناں گھن ڳھدن جنھاں اچ تریمتاں، ٻال، طبی عملے اتے انسانی ہمدردی دے کم کرݨ آلے کارکنان شامل ہن جیڑھے جو اسرائیل دے وحشیانہ قبضے دے ھک ٻئے سیاہ باب دی نشاندہی کریندن ۔ ترجمان آکھئے پاکستان اسرائیل دے تازہ ترین فوجی حملے دی مذمت کریندے جئیں دا مقصد نویں سکیورٹی کوریڈورز قائم کرݨ اے ، جیں اچ موراگ کوریڈور تے غیر قانونی قبضہ تے مزید فلسطینی زمین تے قبضہ شامل اے ۔ انہاں آکھئے جبالیہ اچ اقوام متحدہ دے زیرانتظام ھک کلینک کوں ڄاݨ ٻجھ تے نشانہ بݨاوݨ جیں اچ 7 سو توں ودھ بے گھر شہریاں کوں پناہ ݙتی ہئی ہئی ، اسرائیل دی بین الاقوامی قانون اتے انسانی اصولاں دی صریح بے توقیری کوں ظاہر کریندے ۔ ترجمان آکھئے اے کارروائیاں فلسطینیاں کوں نسلی طور تے انہاں دی سرزمین توں مٹاوݨ دے اسرائیل دے واضح ارادے نال بین الاقوامی قانون دے تحت جنگی جرائم دا درجہ رکھیندن ۔ ترجمان مزید آکھئے خاص طور تے تشویش دی ڳالھ اے ہے جو عیدالفطر دے مقدس موقع تے اسرائیلی قابض افواج دی طرفوں مسجد اقصیٰ دے احاطے تے وحشیانہ دھاوا بولݨا اے ، اے اشتعال انگیز عمل نہ صرف اسلام دے مقدس ترین جاہ اچوں ھک دے تقدس کوں پامال کریندے بلکہ خطے اچ کشیدگی ودھاوݨ تے آپݨے توسیع پسندانہ ایجنڈے کوں اڳوں ودھاوݨ دے اسرائیل دے عزم کوں وی ظاہر کریندے ۔ انہاں آکھئے بے تحاشہ بمباری اتے زمینی کارروائیاں دے ذریعے شہریاں دے بنیادی ڈھانچے دی وݙے پیمانے تے تباہی اتے لکھاں فلسطینیاں دی جبری نقل مکانی اخلاقی طور تے قابل مذمت اتے قانونی طور تے ایں دا دفاع نی کیتا ونڄ سڳدا ۔ ترجمان آکھیے بین الاقوامی قوانین دی ایہو سویاں کھلم کھلا خلاف ورزیاں کوں وختی روکݨا چاہیدے ، پاکستان فلسطینی عوام دے حق خود ارادیت سانڳے آپݨی غیر متزلزل حمایت دا اعادہ کریندے تے 1967 توں پہلے دی سرحداں تے مبنی ھک آزاد، قابل عمل اتے متصل فلسطینی ریاست دے قیام دا مطالبہ کریندے جئیں دا دارالحکومت القدس الشریف ہووے۔ ترجمان آکھئے بین الاقوامی برادری کوں مزید نشوم جاںاں دے ضیان کوں روکݨ تے مقدس جاہ دے تقدس دے تحفظ سانڳے فیصلہ کن کارروائی کرݨی چاہیدی اے۔
