صدر مملکت آصف علی زرداری دا شہید ذوالفقار علی بھٹو دے ورھیݨے تے پیغام

اسلام آباد۔4اپریل(اے پی پی) صدر مملکت آصف علی زرداری پاکستان دے عظیم رہنما شہید ذوالفقار علی بھٹو دی خدمات، جدوجہد اتے قربانیاں کوں خراج عقیدت پیش کریندے آکھیے ملک دی خودمختاری، جمہوریت اتے عوامی حقوق دے تحفظ سانڳے ہرممکن اقدام کریسوں۔ ایوان صدر دے پریس ونگ موجب صدر مملکت شہید ذوالفقار علی بھٹو دے ورھیݨے تے آپݨے سنھیے اچ آکھیے جو پاکستان کوں شہید بھٹو دے وژن موجب ھک ترقی یافتہ، خودمختار اتے عوام دوست ملک بݨیسوں ۔ انہاں آکھیے شہید بھٹو ھک عظیم مدبر، جرات مند رہنما اتے عوام دے حقیقی نمائندہ ہن، شہید ذوالفقار علی بھٹو پاکستان کوں ترقی، خودمختاری تے عوامی فلاح دے رستے تے ٹوریا۔ صدر مملکت آکھیے شہید ذوالفقار علی بھٹو قوم کوں پہلا متفقہ آئین ݙتا، انہاں پاکستان دے ایٹمی پروگرام دا منڈھ ٻدھیا تے ملک دی خارجہ پالیسی کوں ھک آزاد اتے خودمختار تشخص ݙتا۔صدر آصف علی زرداری آکھیے جو شہید ذوالفقار علی بھٹو دی قیادت اچ پاکستان اسلامی سربراہی کانفرنس دی میزبانی کیتی تے مسلم امہ دے اتحاد دا رستہ ہموار کیتے۔ صدر مملکت آکھیے شہید بھٹو مزدوراں، کساناں تے پسے ہوئے طبقے کوں حقوق ݙتے تے انہاں کوں بااختیار بݨایا، شہید ذوالفقار علی بھٹو دے اقدامات پاروں تعلیم، صنعت اتے دفاعی شعبے اچ نمایاں پیشرفت تھئی۔ انہاں آکھیے اساں شہید ذوالفقار علی بھٹو دے مشن کوں جاری رکھیسوں تے پاکستان دی خودمختاری، جمہوریت اتے عوامی حقوق دے تحفظ سانڳے ہر ممکن اقدام کریسوں ۔ صدر مملکت آکھیے جو اڄ دے ݙینھ عہد کریندوں جو پاکستان کوں شہید بھٹو دے وژن موجب ھک ترقی یافتہ، خودمختار اتے عوام دوست ملک بݨیسوں