اسلام آباد۔4اپریل(اے پی پی) وفاقی وزیر پٹرولیم علی پرویز ملک نال پاکستان اچ امریکی ناظم الامور نیتالی بیکر ملاقات کیتی۔ ملاقات اچ ݙوپاسے توانائی تعاون، پائیدار ترقی اتے پاک امریکہ تعلقات دے ودھارے تے ڳالھ مہاڑ کیتی ڳئی ۔ ترجمان پٹرولیم ڈویژن توں جاری اعلامیہ موجب ملاقات اچ امریکہ اتے پاکستان وچال توانائی دے شعبے اچ شراکت داری بشمول قابلِ تجدید توانائی دے منصوبے، معدنیات، ہائیڈروکاربنز تے بنیادی ڈھانچے دی سرمایہ کاری، توانائی دے اہم چیلنجز، ٹیکنالوجی دی جدت اتے پاکستان دی ودھدی توانائی دی ضرورتاں کوں پورا کرݨ سانڳے پالیسی اقدامات تے توجہ ݙتی ڳئی ۔ ایں توں انڄ ݙوہیں رہنمااں سانجھے فیدے دی شراکت اتے توانائی شعبے دی پائیداری سانڳے مستقبل دے لائحہ عمل تے وی ڳالھ مہاڑ کیتی ۔ ایں موقع تے وفاقی وزیرعلی پرویز ملک امریکی حکومت دے مسلسل تعاون دا خیرمقدم کریندے آکھیے پاکستان امریکہ نال آپݨے سٹریٹجک تعلقات کوں اہمیت ݙیندے تے چاہندے جو اے تعلقات ڈویلپمنٹ پارٹنرز دے طور تے استوار ہوون ، اساں تیل، گیس اتے قابلِ تجدید توانائی دے شعبیں اچ سانجھے منصوبے ڳولݨ چاہندوں پائیدار ترقی اتے عوام سانڳے سستی توانائی کوں یقینی بݨایا ونڄ سڳے ۔ وفاقی وزیر امریکی ناظم الامور دا شکریہ ادا کیتے تے انہاں اڳلے ہفتے تھیوݨ آلے پاکستان منرلز انویسٹمنٹ فورم اچ امریکی اعلیٰ سطحی وفد دی شرکت سانڳے ذاتی طور تے کاوش کیتی۔ ایں فورم اچ امریکہ دے ایکٹنگ اسسٹنٹ سیکرٹری جنوبی و وسطی ایشیا ایرک میئر شرکت کریسن ۔ نیتالی بیکر پاکستان دی معاشی بحالی اتے اہم اصلاحات دے کامیاب عمل دی تعریف کیتی انہاں وزیراعظم شہباز شریف اتے انہاں دی کابینہ کوں ایں کامیابی تے مبارخ ݙتی ۔ انہاں آکھیے امریکہ دا پاکستان نال سکیورٹی دے شعبے اچ مثبت تعاون جاری اے، امریکی صدر ڈونلڈ ٹرمپ اپݨے پہلے خطاب اچ وزیراعظم شہباز شریف دی قیادت اچ پاکستان دی سیکورٹی کوششاں دی تعریف کیتی اے تے ہݨ ویلھا آڳئے جو ایں تعلق کوں ودھایا ونڄے تے ایں کوں نویں سطح تے گھن ونڄوں ۔ انہاں وزیراعظم شہباز شریف دی قیادت اچ اصلاحات دے رستے تے پاکستان کوں مکمل تعاون دا یقین ݙیوائے ۔ ملاقات اچ ݙوہیں رہنماواں سانجھی توانائی دے اہداف اڳوں ودھاوݨ تے پاک-امریکہ تعاون دے نویں رستے ڳولݨ دا سانجھا عزم کیتے۔
