اسلام آباد۔5اپریل(اے پی پی) پارلیمانی سیکرٹری اطلاعات ونشریات بیرسٹر دانیال چوہدری آکھیے اڑان پاکستان پروگرام توں قومی معیشت کوں ترقی ݙیسوں ، نفرت،ڳالھیں مندے تے جلائو گھیرائو دی سیاست تے نی بلکہ ترقی دی سیاست تے یقین رکھیندوں ، خیبر پختونخوا حکومت دی کرپشن دیاں نویاں داستاناں سامݨے آندیاں پئن ، باچا خان یونیورسٹی اچ بوگس بورڈ بݨایا ڳیا ، سینکڑاں غیر قانونی بھرتیاں کیتیاں ڳئن ، خیبر پختونخوا اچ بلین سونامی ٹری دے ناں تے ارباں دی کرپشن کیتی ڳئی ، ساݙی حکومت ای گورننس اتےڈ یجیٹلائزیشن ،عوام کوں ریلیف ݙیوݨ دے پاسے ودھدی پئی اے سارے سرکاری ٹھیکے ای پورٹل تے منتقل کرݙتن ،کساناں کوں سستے ٹریکٹر تے نینگراں کوں لیپ ٹاپ ݙتن ،ݙوجھے پاسے ھک صوبائی حکومت اپݨے نوجوان طبقہ کوں جلائو گھیرائو سکھیندی پئی اے ، حکومت ݙینھ رات محنت کرتے بجلی دی قیمت اچ ریلیف ݙتے ،معاشی استحکام توں غیر ملکی سرمایہ کاری ، کاروباری اتے صنعتی سرگرمیاں اچ ودھارا تھیسی اے ڳالھیں انہاں اتھاں پریس کانفرنس کریندے آکھئن ۔ انہاں آکھیے جݙاں اساکوں حکومت ملی اوں ویلھے گھنٹے تے ݙینھاں اچ ملک دیوالیہ تھیوݨ دیاں ڳالھیں تھیندیاں پیاں ہن ، اڄ ملکی معیشت استحکام آلے پاسے ٹردی پئی اے ، سیاسی اتے معاشی استحکام اچ توازن اے، ایں عمل سانڳے حکومت دیاں ݙینھ رات دیاں کوششاں ہن ساݙی جماعت واحد جماعت اے جئیں ہمیشہ ڈلیور کیتے تے وزیراعظم دی قیادت اچ صرف ماہ رمضان اچ وفاقی دارالحکومت اچ 4 ملین خانداناں کوں ڈیجیٹل کیش دی منتقلی کیتی ڳئی ایں توں انڄ وزیراعلی پنجاب دی طرفوں 3 ملین توں ودھ لوکاں کوں 10 ہزار روپے فی خاندان راشن ݙتا ڳئے ۔ وفاق اتے پنجاب اچ کمیٹیاں بݨائیاں ڳئن تے ایں ڳالھ کوں یقینی بݨایا ڳئے جو عوام کوں ریلیف ملسی تے وزرا انھاں کمیٹیاں دی نگرانی کریندے پئے ہن جݙاں 2013 اچ اساکوں حکومت ملی ایں ویلھے ساریں توں وݙا بحران توانائی دا ہئی ، 22 ، 22 گھنٹے لوڈ شیڈنگ ہئی، ݙینھ رات محنت کرتے ہزاراں میگاواٹ بجلی نیشنل گرڈ اچ رلا تے پاکستانی عوام دے ساریں توں وݙے بحران کوں حل کیتا ۔ ݙینھ رات دی محنت پاروں 7.69 روپے فی یونٹ صنعتی صارفین سانڳے بجلی دی قیمت گھٹ کرݙتی ڳئی اے اتنا وݙا ریلیف اے جو جئیں دے ثمرات آندے ݙینھاں اچ نظر آسن اے عمل تسلسل دا نتیجہ اے ، پہلی سیڑھی دے بعد چوتھی سیڑھی نی آندی ، پہلے 200 یونٹ دے صارفین کوں ریلیف ݙا ، ماضی اچ حکومت ہتھ پیر ٻدھ تے ملک کوں دیوالیہ کرݨ دے نیڑے چھوڑ ڳئی ہئی ، لہو لہان کر تے پچھدے ہن جو اے خون کیوں نکلدا پئے اساں ہر مرحلے کوں پار کیتے تے عوام کوں ریلیف ݙتے ایں دے مزید ریلیف وی آسن ۔ بیرسٹر دانیال آکھیے کوئی ایجھا مہینہ کائنی جیں اچ وفاقی حکومت ہووے یا پنجاب حکومت جئیں ریلیف نی ݙتا جݙاں جو ھک صوبے اچ نینگراں کوں اکسایا ڳیا ۔ نویں نسل کوں بہتر ملک ملسی اے ٻال ہی ایں ملک دا مستقبل ہن تے آئی ٹی دے شعبہ اچ اے ٻال پاکستان دا ناں روشن کریسن۔
