راولپنڈی۔6اپریل(اے پی پی) سکیورٹی فورسز 5/6 اپریل دی وچلی رات پاک-افغان سرحد دے نیڑے شمالی وزیرستان دے عمومی علاقہ حسن خیل اچ خوارج دے ھک گروپ دی سرحد پار دراندازی اتے حملے دی کوشش ناکام بݨیندے 8 خوارج کوں جہنم واصل اتے 4 کوں زخمی کرݙتے ۔ پاک فوج دے شعبہ تعلقات عامہ (آئی ایس پی آر) موجب اطلاع ملدے ہی ساݙے فوجی دستے مؤثر طریقے نال انہاں کوں روکیے تے حملے کوں ناکام بݨائے ۔ فائرنگ دے شدید تبادلے دے بعد 8 خوارج جہنم واصل کرݙتے ڳئن ، جݙاں جو چار خوارج زخمی تھئن ۔ پاکستان مسلسل افغان عبوری حکومت توں مطالبہ کریندا آندے جو او سرحدی انتظام کوں مؤثر بݨاوے۔ افغان عبوری حکومت توں توقع کیتی ویندی اے جو او آپݨی ذمہ واریاں پوری کریسی تے آپݨی سرزمین کوں خوارج سانڳے پاکستان دے خلاف دہشت گردی دیاں کارروائیاں کیتے استعمال تھیوݨ توں روکیسی۔ علاقے اچ کہیں وی ݙوجھے خوارج کوں مُکاوݨ سانڳے کلیئرنس آپریشن جاری اے کیوں جو پاکستان دی سیکورٹی فورسز ملک دی سرحداں دی حفاظت اتے دہشت گردی مکاوݨ سانڳے پُرعزم اے
