اسلام آباد۔7اپریل(اے پی پی) وزیراعظم محمد شہباز شریف ملکی بندرگاہواں کوں مسابقتی معیارتے گھن آوݨ سانڳے تجارتی ٹیرف تے نظر ثانی کرݨ، کسٹمز کلیئرنس دے دورانیے کوں گھٹ کرݨ سانڳے لائحہ بݨاوݨ تے جدید سکینرز لاوݨ دا عمل تکھا کرݨ دی ہدایت کیتی اے ۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی صدارت اچ میری ٹائم سیکٹراچ اصلاحات تے اجلاس تھئے ۔ اجلاس توں خطاب کریندے وزیر اعظم آکھیے توانائی دے شعبے اچ پائیدار اصلاحات سانڳے بݨائی ڳئی ٹاسک فورس دیاں کوششاں توں بجلی دے نرخاں اچ اڄوکی کمی ممکن تھئی شعبہ توانائی سانڳے بݨائی ڳٰئی ٹاسک فورس دی طرز تے میری ٹائم سیکٹر اچ پائیدار اصلاحات کیتے ٹاسک فورس کم کریندی پئی اے انہاں آکھیے سمندر نال جڑی اکانومی اچ وݙے عرصے توں موجود جمود کوں ختم کرݨ سانڳے اصلاحات تے کم تکھے جاری اے ، اللہ تعالیٰ پاکستان کوں وݙا ساحل، سمندر اتے ٻئے لامحدود وسائل عطا کیتن ، عالمی معیشت دی ترقی سمندری وسائل اتے انہاں تئیں رسائی نال جڑی اے ۔ وزیراعظم ہدایت کیتی جو ملکی بندرگاہواں کوں مسابقتی معیار تے گھن آوݨ سانڳے تجارتی ٹیرف تے ݙوجھی نظر پاتی ونڄے ۔ انہاں کسٹمز کلیئرنس دے عمل اچ گرین چینل دی طرز تے تیزی گھن آوݨ سانڳے ریڈ اتے ییلو چینلز اچ کلیئرنس دے دورانیے کوں گھٹ کرݨ سانڳے لائحہ عمل بݨاوݨ دی ہدایت کیتی ۔ انہاں حکم ݙتے بندرگاہواں تے موجود کنٹینراں دی موجودگی دے دورانیے کوں گھٹ کرݨ سانڳے لائحہ عمل بݨایا ونڄے۔ وزیراعظم بندرگاہواں تے موجود نیلام تھیوݨ آلے کنٹینراں کوں وختی نیلام کرݨ دی ہدایت کیتی تاں جو پورٹ تے موجود جاہ دا بہتر استعمال کیتا ونڄ سڳے ۔ وزیر اعظم ساریاں بندرگاہواں تے جدید ترین سکینر لاوݨ دی رفتار تکھی کرݨ دی ہدایت کیتی۔ وزیر اعظم بحری امور اچ اصلاحات سانڳے بݨائی ڳئی ٹاسک فورس دے ارکان تے ٻئے سٹیک ہولڈرز دے کم دی تعریف کیتی ۔ وزیر اعظم کوں ایں موقع تے بریفنگ اچ ݙسایا ڳئے جو اڳلے ݙاہ سال دی ضرورتاں کوں سامݨے رکھیندے نیشنل ڈریجنگ پلان تشکیل ݙتا ڳئے جیں دے تحت ساریاں ملکی بندرگاہواں دی ڈریجنگ سانڳے نیشنل ڈریجنگ کمپنی بݨائی ویسی، اڳلے 25 سال دی ضرورتاں کوں سامݨے رکھیندے پاکستان نیشنل شپنگ کارپوریشن دی بحالی تے تعمیر نو دا لائحہ عمل وی تیار کرڳھدا ڳئے ، پاکستان نیشنل شپنگ کارپوریشن اچ پبلک پرائیویٹ پارٹنرشپ دے ذریعے نجی شعبے کوں شامل کیتا ویسی ۔ اجلاس اچ کراچی پورٹ ٹرسٹ اچ تربیت یافتہ افرادی قوت شامل کرݨ سانڳے حکمت عملی پیش کیتی ڳئی ۔ وزیر اعظم کوں ݙسایا ڳئے ملکی بندرگاہواں دی کارکردگی بہتر بݨاوݨ سانڳے ساریاں بندرگاہوں دا فنانشل، ایچ آر اتے پرفارمنس آڈٹ کیتا ویسی ، کیمیائی فضلہ اتے ٻئے خطرناک مواد کوں تلف کرݨ سانڳے گڈانی اچ پلانٹ لاتا ویندا پئے ساریاں بندرگاہواں تے ھکو سواں اصول و ضوابط دے نفاذ سانڳے پاکستان میری ٹائم پورٹ ایکٹ حتمی مرحلے وچ اے ۔ اجلاس اچ نائب وزیراعظم و وزیر خارجہ محمد اسحاق ڈار، چیف آف آرمی سٹاف جنرل سید عاصم منیر، وفاقی وزرا خواجہ محمد آصف، احسن اقبال، اعظم نذیر تارڑ، احد خان چیمہ، جنید انور، وزیراعظم دے مشیر سید توقیر شاہ، گورنر سٹیٹ بینک اتے متعلقہ اداریں دے اعلیٰ افسر شریک تھئن۔
