اسلام آباد۔8اپریل(اے پی پی) انصاف چنڳے طریقے نال ݙیوݨ سانڳے سٹیک ہولڈرز کوں رلاوݨ دیاں کوششاں دے تحت سپریم کورٹ آف پاکستان اچ چیف جسٹس آف پاکستان جسٹس یحییٰ آفریدی دی صدارت اچ مشاورتی اجلاس تھئے ۔ سپریم کورٹ دے شعبہ تعلقات عامہ دے جاری اعلامیہ موجب اجلاس اچ اٹارنی جنرل آف پاکستان خواجہ حارث سینئر ایڈووکیٹ سپریم کورٹ، فضل الحق عباسی سینئر ایڈووکیٹ سپریم کورٹ، کامران مرتضیٰ سینئر ایڈووکیٹ سپریم کورٹ، فیصل صدیقی سینئر ایڈووکیٹ سپریم کورٹ، منیر پراچہ، سینئر ایڈووکیٹ سپریم کورٹ بار کونسل، ایڈووکیٹ احمد فاروق، ایڈووکیٹ سپریم کورٹ اتے ٻئیں شرکت کیتی ۔ حیات علی شاہ، ڈی جی، جوڈیشل اکیڈمی اتے سیدہ تنزیلہ صباحت، سیکرٹری لاء اینڈ جسٹس کمیشن آف پاکستان شرکت کیتی۔سیشن دا مقصد خاص طور تے اصلاحات تے سستے انصاف، قانونی چارہ جوئی دی سہولت اتے ملک دے نظام عدل کوں نویں سروں بݨاوݨ سانڳے ھک مربوط پالیسی اپروچ بارے شرکا دی صلاح گھنݨ ہئی ۔انصاف ݙیوݨ اچ بار دے کردار تے زور ݙیندے چیف جسٹس آف پاکستان/ چیئرمین، نیشنل جوڈیشل (پالیسی سازی) کمیٹی (این جے پی ایم سی) زور ݙے تے آکھیے جو صرف اوہے اصلاحات نتائج ݙیندن جنہاں اچ سٹیک ہولڈرز دی صلاح شامل ہوندی اے ۔ انہاں مزید آکھیے اے نشست این جے پی ایم سی دی آندی میٹنگ دے ایجنڈے تے صلاح گھنݨ سانڳے سٹیک ہولڈرز نال تھیوݨ آلیاں ملاقاتاں دے سلسلے اچ ھک ہئی شرکاء کوں نیشنل جوڈیشل (پالیسی سازی) کمیٹی دے مجوزہ ایجنڈے بارے ݙسایا ڳئے جیں اچ جبری گمشدگیاں دے کیس، کمرشل لٹیگیشن کوریڈور، ڈبل ڈاکٹ کورٹ رجیم، عدالت نال منسلک ثالثی کوں ادارہ جاتی شکل ݙیوݨ ، ماڈل کریمنل ٹرائل کورٹس دا قیام، ضلعی عدلیہ سانڳے بھرتی دے طریقہ کار دی معیار بندی، ضلعی عدلیہ پالیسی فورم، ضلعی عدلیہ دی ملازمت دی شرطاں تے ضوابط اچ برابری، سمندرپار موقع تئیں رسائی اتے پیشہ ورانہ ترقی دے پروگرام شامل ہن۔ شرکا تفصیلی غو کریندے آپݨی بصیرت، مہارت اتے تجویزاں دا تبادلہ کیتے۔انہاں چیف جسٹس دا شکریہ ادا کیتے جو انھاں انصاف دی چنڳی تے موثر فراہمی اچ کردار نبھاوݨ دا موقع ݙتے ۔ چیف جسٹس شرکا دی صلاح دی تعریف کریندے آکھیے بامقصد پیشرفت ایجھے تعاون نال ہی ممکن اے۔
