اسلام آباد۔8اپریل(اے پی پی) وزیراعظم محمد شہباز شریف عالمی شپنگ کمپنی دی پاکستان اچ 2 بلین ڈالر دی سرمایہ کاری دا خیر مقدم کریندے آکھیے ساریاں رکاوٹاں ہٹا تے میری ٹائم شعبے کوں عالمی مسابقتی معیار تے گھن آوݨ دا ویلھا آڳئے ، خطے اچ تجارت اتے نقل و حمل سانڳے پاکستان دی بطور راہداری اہمیت اچ ودھارا تھئے ۔ وزیراعظم دفتر دے میڈیا ونگ تں جاری بیان موجب وزیراعظم اے ڳالھ عالمی شپنگ کمپنی اے پی مولر۔میرسک(A. P. Moller – Maersk )دے بورڈ آف ڈائریکٹرز دے چیئرمین رابرٹ میرسک کوں ملاقات اچ آکھی ۔ وزیراعظم عالمی شپنگ کمپنی دی پاکستان اچ 2 بلین ڈالر دی سرمایہ کاری دا خیر مقدم کریندے گزریل سال اے پی مولر۔میرسک نال دستخط کیتی ڳئی مفاہمت دی یاداشتاں کوں وختی معاہدیں دی شکل ݙیوݨ دی ہدایت کیتی ۔ وزیراعظم عالمی شپنگ کمپنی نال میری ٹائم سیکٹر اچ اشتراک دے معاہدے دی تشکیل دے عمل کوں تکھا کرݨ سانڳے ٹیکنیکل ورکنگ گروپ بݨاوݨ تے ھک مہینے اندر سفارشات پیش کرݨ دی ہدایت کیتی ۔ وزیراعظم آکھیے ہݨ ویلھا آڳئے جو ساریاں رکاوٹاں کوں ہٹا تے میری ٹائم شعبے کوں عالمی مسابقتی معیار تے گھن آیا ونڄے۔ انہاں آکھیے اے پی مولر۔میرسک دی طرفوں پاکستان اچ سرمایہ کاری توں پاکستان دے میری ٹائم سیکٹراچ وسیع پیمانے تے مثبت تبدیلی آسی ۔ وزیراعظم آکھیے اللہ تعالیٰ پاکستان کوں وسیع سمندری وسائل نال نوازیے ، ایں شعبے دی استعداد توں فیدہ چارتے انہاں وسائل کوں ملکی بہتری سانڳے استعمال کرݨ سانڳے کوشاں ہیسے۔ انہاں آکھیے اڄوکے عالمی منظر نامہ اچ خطے اچ تجارت اتے نقل و حمل سانڳے پاکستان دی بطور راہداری اہمیت اچ ودھارا تھئے ، ملکی معیشت دی ترقی سانڳے ضروری اے جو اساں خطے اچ ٹرانزٹ ٹریڈ کیتے پاکستان کوں ھک قابل اعتبار اتے مؤثر اقتصادی راہداری بݨاؤں ۔ ملاقات اچ وزیراعظم اے پی مولر۔میرسک کوں پاکستان اچ مزید سرمایہ کاری دے موقع ڳولݨ دی دعوت ݙتی ۔ ایں موقع تے رابرٹ میرسک وزیراعظم کوں ݙسائے جو پوری دنیا اچ اے پی مولر۔میرسک دے کلائنٹس پاکستان اچ سرمایہ کاری اتے کاروبار دے موقع اچ دلچسپی ݙکھائی اے ایں خطے اچ اے پی مولر۔میرسک دا پہلا بحری جہاز 1924 اچ آیا ہئی تے اڄ خطے اچ پاکستان نال ساݙے تعلقات کہیں وی دور دے مقابلے اچ تکڑے ہن ، انہاں آکھیے پاکستان دا وسط ایشیائی ملکاں نال تجارت سانڳے ایں خطے اچ بطور اقتصادی راہداری کلیدی کردار اے جیڑھا جو ساݙی کمپنی کیتے ٻہوں اہم اے ۔رابرٹ میرسک پاکستان دی سمندری بندرگاہواں اچ سرمایہ کاری اچ دلچسپی ظاہر کریندے آکھیے پاکستان دی بندرگاہواں اچ لاجسٹکس دا جدید ترین نظام اتے انھاں کوں جدید ترین ٹیکنالوجی توں لیس کر تے خطے اچ بذریعہ سمندر تجارت سانڳے ھک منفرد مرکز بݨاوݨ سانڳے کوشاں ہیسے۔ رابرٹ میرسک حکومت دی معاشی پالیسیاں دی تعریف کریندے سرمایہ کاری کوں راغب کرݨ سانڳے پر کشش قرارݙتا۔ ملاقات اچ عالمی شپنگ کمپنی دے ڈی ای او کیتھ سوینڈسن، ڈنمارک دے سفیر جیکب لینلف، وزیر خزانہ محمد اورنگزیب، وفاقی وزیر اقتصادی امور احد خان چیمہ، وزیر بحری امور محمد جنید انور چوہدری، وزیراعظم دے مشیر سید توقیر شاہ، معاون خصوصی طارق فاطمی تے متعلقہ اداریں دے اعلیٰ افسر وی موجود ہن۔
