اسلام آباد۔8اپریل (اے پی پی) وزیرِاعظم محمد شہباز شریف آکھیے پاکستان دی ترقی سانڳے بلوچستان دی ترقی ٻہوں اہمیت رکھیندی اے ،بلوچستان دی باصلاحیت افرادی قوت ملک دا قیمتی اثاثہ اے، بلوچستان دی ترقی دے اقدامات جاری رہسن ۔ وزیراعظم دفتر دے میڈیا ونگ توں جاری بیان موجب اے ڳالھ انہاں بلوچستان دے وکلاء دی اعلی سطحی قیادت کوں ملاقات اچ آکھی ۔ملاقات اچ وفاقی وزیرِ قانون و انصاف اعظم نذیر تارڑ، صدر سپریم کورٹ بار ایسوسی ایشن رؤف عطاء، صدر بلوچستان ہائی کورٹ بار ایسوسی ایشن عطاء اللہ لانگو اتے رکن بلوچستان بار کونسل خلیل کاکڑ موجود ہن۔ ایں موقع تے بلوچستان دی موجودہ امن و امان و سکیورٹی دی صورتحال تے ڳالھ مہاڑ کیتی ڳئی ۔وزیراعظم آکھیے پاکستان دی ترقی سانڳے بلوچستان دی ترقی اہمیت رکھیندی اے ،بلوچستان دی باصلاحیت افرادی قوت پاکستان دا قیمتی اثاثہ اے،حکومت دے بلوچستان دی ترقی دے اقدامات ایویں جاری رہسن ۔وفد وزیرِ اعظم توں درخواست کیتی جو وفاقی حکومت بلوچستان اچ امن و امان دی صورتحال دی بہتری سانڳے مؤثر کردارنبھاوے ایں حوالے نال وفد بلوچستان اچ قانونی کاروائیاں دے نال سیاسی و قبائلی قیادت نال مشاورت کوں کلیدی اہمیت دا حامل قرار ݙتے ۔ وفد وزیرِ اعظم کوں ایں حوالے نال ٻئی سیاسی قیادت و رہنماواں نال آپݨی ملاقاتاں دا وی ݙسائے ،صدر سپریم کورٹ بار اتے صدر بلوچستان ہائی کورٹ بار وزیرِ اعظم کوں بلوچستان اچ گورننس دے امور دے حوالے نال آگاہی ݙیندے سارے مسئلیں دے حل سانڳے وزیرِ اعظم دی قیادت و رہنمائی دی درخواست کیتی۔ وفد وزیرِ اعظم دے بلوچستان دی ترقی کوں ترجیح ݙیوݨ تے بلوچستان دے عوام دی فلاح و بہبود سانڳے وفاق دی طرفوں اقدامات تے وزیرِ اعظم کوں خراج تحسین پیش کیتے۔وفد وزیرِ اعظم دے دانش اسکولز دے ذریعے معاشی طور تے کمزور طبقے دے طلباء و طالبات کوں اعلی تعلیم ݙیوݨ دے اقدام دی تعریف کیتی تے خانزئی اتے منگوچر قلات اچ وی دانش سکولاں دے قیام دی درخواست کیتی۔ وفد وزیرِ اعظم دے بلوچستان دے طالبیں کوں علی تعلیم ݙیوݨ سانڳے ماضی اچ ݙتے ڳئے سینکڑاں اسکالر شپس تے خراج تحسین پیش کیتے تے ایں پروگرام کوں ول شروع کرݨ دی درخواست کیتی ۔ وزیرِ اعظم متعلقہ حکام کوں ایں حوالے نال وختی عملدرآمد دی ہدایات ݙتن۔
