اسلام آباد۔8اپریل(اے پی پی) وزیراعظم محمد شہباز شریف آکھیے پاکستان تے ترکیہ وچال معاشی تعلقات کوں ودھاوݨ دے ٻہوں موقع موجود ہن ، ݙوہیں ملکاں وچال سمندراچ تیل تے گیس دی تلاش دے حوالے نال تعاون دے معاہدے توں ݙو پاسے اقتصادی تعلقات کوں مزید تقویت ملسی ۔ وزیراعظم دفتر دے میڈیا ونگ توں جاری بیان موجب اے ڳالھ ترکیہ دے وزیر توانائی و قدرتی وسائل الپرسلان بائیرقطار دی قیادت اچ 9 رکنی وفد کوں آکھی جنہاں وزیراعظم نال ملاقات کیتی۔وفد نال ڳالھ کریندے وزیراعظم آکھیے پاکستان تے ترکیہ دے صدیاں تے محیط برادرانہ تعلقات تے اساکوں ماݨ اے ،ترکیہ دے صدر رجب طیب اردوان دے اڄوکے دورہ پاکستان توں ݙوہیں ملکاں دے اقتصادی تعلقات اچ مزید بہتری آسی ۔ وزیراعظم ترکیہ دے وزیر توانائی تے اعلیٰ سطحی وفد دا پاکستان منرلز انویسٹمنٹ سمٹ اچ شرکت تے شکریہ ادا کیتے۔ انہاں آکھیے ݙوہیں ملکاں دے معاشی تعلقات کوں نویں وسعت ݙیوݨ دے ٻہوں سارے موقع موجود ہن ،ترکیہ تے پاکستان وچال سمندر اچ تیل اتے گیس ڳولݨ دے حوالے نال تعاون دے معاہدے توں ݙوہیں ملکاں دے اقتصادی تعلقات کوں مزید تقویت ملسی ۔ ملاقات اچ توانائی دے شعبے بالخصوص قابل تجدید توانائی اچ تعاون ودھاوݨ تے اتفاق کیتا ڳئے ۔ترکیہ دے وفد پاکستان اچ توانائی دے شعبے اچ جاری اصلاحات دی تعریف کیتی ۔ ترکیہ دے وزیر توانائی آکھیے توانائی بالخصوص بجلی دے شعبے اچ اصلاحات اتے نجکاری دے سلسلے اچ ترکیہ آپݨا کامیاب تجربہ پاکستان نال شیئر کریسی ،توانائی دے شعبے اچ جاری اصلاحات ایں شعبے کوں سرمایہ کاری سانڳے مزید پرکشش بݨیسن ۔ ترک وزیر پاکستان اچ معدنیات دے شعبے بالخصوص نادر معدنیات دی دریافت اچ گھاٹی دلچسپی ݙکھائی ۔ انہاں آکھیے پاکستان منرلز انویسٹمنٹ سمٹ اچ شرکت توں پاکستان اچ ایں شعبے دی وسیع استعداد دا درست اندازہ تھئے۔ ملاقات اچ نائب وزیر اعظم / وزیر خارجہ محمد اسحاق ڈار،وفاقی وزیر بجلی اویس لغاری،وفاقی وزیر پٹرولیم علی پرویز ملک، معاون خصوصی طارق فاطمی اتے اعلیٰ سرکاری حکام موجود ہن۔
