اسلام آباد۔9اپریل(اے پی پی) ڈپٹی سپیکر قومی اسمبلی سید غلام مصطفیٰ شاہ پیپلز پارٹی دے مرکزی سیکرٹری جنرل تے سینئر سیاستدان سینیٹر تاج حیدر دے انتقال تے ݙکھ تے افسوس کیتے ۔ آپݨے تعزیتی سنھیے اچ انہاں مرحوم تاج حیدر دے گھرآلیں نال تعزیتی تے ہمدردی کریندے آکھیے سینیٹرتاج حیدر زیرک، مخلص اتے اصول پسند سیاستدان اتے پیپلز پارٹی دے بانی ارکان اچوں ہن ، تاج حیدر ہمیشہ پارٹی دے اصولاں نال غیر متزلزل وابستگی دا مظاہرہ کیتا ،انھاں دی سیاسی بصیرت، تحریری قابلیت تے بے لوث خدمات ہمیشہ یاد رکھیاں ویسن۔ ڈپٹی سپیکر آکھیے تاج حیدر دی وفات نہ صرف پیپلز پارٹی بلکہ ملک دی سیاست سانڳے ناقابلِ تلافی ضیان اے ۔ انہاں دی فکری رہنمائی اتے نظریاتی جُڑت پارٹی دے کارکنان سانڳے مشعلِ راہ رہسی ۔ انہاں دعا منڳی جو اللہ تعالی مرحوم تاج حیدر دے درجات اُچے فرماون تے انہاں دے گھرآلیں کوں صبر ݙیون۔
