اسلام آباد۔9اپریل(اے پی پی) پاکستان امریکا نال تجارتی تعلقات ودھاوݨ تے نویں ٹیرف دے حوالے نال مذاکرات سانڳے اعلیٰ سطحی وفد بھیڄݨ دا فیصلہ کیتے ۔ وزیراعظم دفتر دے میڈیا ونگ توں جاری بیان موجب وزیرِاعظم محمد شہباز شریف دی صدارت اچ ملکی برآمدات اچ ودھارے تے امریکا دی طرفوں درآمدات تے لاتے ڳئے نویں ٹیرف دا جائزہ گھنݨ سانڳے اجلاس تھئے جئیں اچ نائب وزیرِاعظم / وزیرِ خارجہ محمد اسحاق ڈار، وفاقی وزرا احد خان چیمہ، محمد اورنگزیب، علی پرویز ملک، مشیر وزیرِاعظم سید توقیرشاہ، معاونین خصوصی طارق فاطمی، ہارون اختر، وزیرِاعظم دے کوارڈینیٹررانا احسان افضل اتے متعلقہ اعلیٰ حکام شرکت کیتی۔اجلاس اچ فیصلہ کیتا ڳئے جو امریکا نال تجارتی تعلقات دے ودھارے تے نویں ٹیرف دے حوالے نال مذاکرات سانڳے اعلیٰ سطحی وفد بھیجا ویسی۔ وزیرِاعظم ہدایت کیتی جو وفد اچ معروف کاروباری شخصیات اتے برآمد کندگان کوں وی رَلایا ونڄے۔ انہاں وفد کوں امریکا دی طرفوں درآمدات تے لاتے ڳئے نویں ٹیرف تے مذاکرات دے بعد مستقبل سانڳے سانجھے طور تے فیدہ مند لائحہ عمل طے کرݨ دا ٹاسک ݙتے ۔ وزیراعظم آکھیے امریکا تے پاکستان دے تجارتی تعلقات ݙھاکیں تے محیط ہن ، حکومت امریکا نال تجارتی شراکت داری کوں مزید تکڑا کرݨ چاہندی اے ۔ وزیرِاعظم کوں اجلاس اچ امریکا دی طرفوں لاتے ڳئے نویں ٹیرف تے سٹیئرنگ کمیٹی اتے ورکنگ گروپ دی رپورٹ اتے مستقبل دا مجوزہ لائحہ عمل پیش کیتا ڳئے ۔ اجلاس اچ مختلف متبادل لائحہ عمل پیش کیتے ڳئن، اجلاس کوں ݙسایا ڳئے امریکا اچ پاکستانی سفارتخانہ مسلسل امریکی حکومت نال رابطے وچ ہے ۔ وزیرِاعظم امریکا نال ایں حوالے نال مذاکرات سانڳے وفد بݨاوݨ دے دوران معروف کاروباری شخصیات اتے برآمد کندگان دی شمولیت یقینی بݨاوݨ دی ہدایت کیتی۔
