لاہور۔9اپریل(اے پی پی) وزیراعظم محمد شہباز شریف غزہ دے نہتے فلسطینیاں تے جاری صیہونی ظلم و جبر دے خلاف ہر بین الاقوامی فورم تے آواز چاوݨ دا عزم کریندے آکھیے فلسطینیاں دی حمایت دے حوالے نال پاکستان دا مؤقف واضح اے۔ وزیراعظم دفتر دے میڈیا ونگ توں جاری بیان موجب اے ڳالھ انہاں امیر جماعت اسلامی حافظ نعیم الرحمن دی قیادت اچ جماعت دے ترائے رکنی وفد کوں ملاقات اچ آکھی ۔ ݙوہیں رہنماواں غزہ اچ نہتے فلسطینیاں تے اسرائیل دی بلا اشتعال بمباری اتے ظلم و ستم تے بین الاقوامی قوتاں دی خاموشی تے تشویش دا اظہار کیتے۔ وزیراعظم غزہ دے نہتے فلسطینیاں تے جاری صیہونی ظلم و جبر دے خلاف ہربین الاقوامی فورم تے آواز چاوݨ تے پاکستان دی حمایت جاری رکھݨ دا عزم کیتے۔ وزیراعظم آکھیے صیہونی ظلم و جبر دے شکار نہتے فلسطینی بھیݨ بھراویں دی حمایت دے حوالے نال پاکستان دا مؤقف واضح ہے۔ امیر جماعت اسلامی بجلی دیاں قیمتاں اچ اڄوکی کمی تے وزیرِاعظم دا شکریہ ادا کیتے۔ وزیراعظم آکھیے حکومتی ٹیم توانائی دے شعبے اچ لمبی مدت اصلاحات گھن آوݨ سانڳے ݙینھ رات محنت کریندی پئی اے ، توانائی دے شعبے اچ مزید اصلاحات عام آدمی دی زندگی اچ سوکھ کوں سامݨے رکھیندے کیتیاں ویندیاں پئن ، اساں اوکھ دے باوجود عوامی ریلیف کوں اولین ترجیح ݙتی تے اے مشن جاری رکھیسوں ، انشاء اللہ پاکستان دی ترقی دا سفر جاری رہسی ۔ ملاقات اچ نائب وزیراعظم / وزیرخارجہ محمد اسحاق ڈار، وفاقی وزیر اطلاعات و نشریات عطا اللہ تارڑ، جماعت اسلامی دے رہنما لیاقت بلوچ اتے آصف لقمان قاضی وی شریک ہن۔
