اسلام آباد۔9اپریل(اے پی پی) وفاقی وزیرخزانہ و محصولات، سینیٹر محمد اورنگزیب آکھیے حکومت پاکستان اچ تجارت، سرمایہ کاری تے سیاحت کوں ودھارا ݙیوݨ تے خطے اچ ابھردی ہوئی اقتصادی راہداریاں توں بھرپورفیدہ چاوݨ چاہندی اے ۔ اے ڳالھ اںہاں وزارتِ خزانہ اچ عالمی پیشہ ورانہ خدمات ݙیوݨ آلی فرم الویریز اینڈ مارسل دے وفد کوں ملاقات اچ آکھی ۔ اے ملاقات پاکستان اچ نجکاری دے عمل تے خودمختار ویلتھ فنڈ دے قیام دے سلسلے اچ جاری مشاورت دا حصہ ہئی۔ الویریز اینڈ مارسل دے وفد دی قیادت ڈویژن ایگزیکٹو پیٹر بریگز کیتی جݙاں جو انہاں دے رلے عبداللہ الاِبعاری، منیجنگ ڈائریکٹر، اتے گلوبل ہیڈ آف ساورن ایڈوائزر رضا باقر وی موجود ہن۔ملاقات اچ پیٹر بریگز پاکستان اچ سرمایہ کاری سانڳے الویریز اینڈ مارسل دے تکڑے عزم دا اظہار کیتے تے ایں خطے دی ابھردی منڈیاں اچ کمپنی دی وݙی مدت حکمت عملی کوں اجاگر کیتے ۔ انہاں آکھیے کمپنی پاکستان اچ آپݨا دفتر کھولݨ تے غور کریندی پئی اے تاں جو حکومت کوں نجکاری دے عمل اچ مدد ݙتی ونڄ سڳے تے بین الاقوامی سرمایہ کاراں کوں ملک اچ سرمایہ کاری سانڳے گھن آیا ونڄ سڳے ۔ انہاں موجب پاکستان دی ابھردی ہوئی مارکیٹ سرمایہ کاری اتے لمبی مدت ترقی سانڳے بے پناہ موقع ݙیندی اے ۔سینیٹر محمد اورنگزیب الویریز اینڈ مارسل دی دلچسپی دا خیرمقدم کریندے نجکاری اتے سوورین ایڈوائزری اچ کمپنی دی مہارت دی تعریف کیتی ۔ وزیر خزانہ ملک اچ سرمایہ کاری دے موقع کوں مؤثر انداز اچ کھولݨ سانڳے انہاں دے کردار دی تعریف کیتی ، بالخصوص بجلی دی تقسیم کار کمپنیاں دی نجکاری دے ضمن اچ انہاں آکھیے حکومت نجکاری دے عمل کوں تکھا کرݨ سانڳے پرعزم اے تے ہݨ تئیں 24 سرکاری اداریں دی نجکاری کوں فہرست اچ رلایا ڳئے ۔ایں موقع تے سینیٹر اورنگزیب گزریل 14 مہینے اچ پاکستان دی معیشت اچ تھیوݨ آلی بہتری دا ذکر کیتے تے آکھیے معیشت دے استحکام مارکیٹ کوں نویں زندگی بخشی اے اتے ترقی دے نویں رستے کھلئن ۔ انہاں عالمی شپنگ کمپنی اے پی مولر میرکس دی طرفوں میری ٹائم سیکٹر اچ وݙی سرمایہ کاری دے اڄوکے اعلان دا حوالہ ݙتے ایندے نال مقامی سرمایہ کار اتے کاروباری حضرات وی نویں جوش تے جذبے نال انہاں موقع توں فیدہ چاوݨ سانڳے اڳوں آندے پئن ۔ وزیر خزانہ آکھیے اے سارے معاشی بہتری دی واضح علامتاں ہن اتے پاکستان دی ترقی سانڳے امید افزا اشارے ہن۔ وزیر خزانہ ایں ڳالھ دا اعادہ کیتے جو حکومت دا وژن وزیرِاعظم شہباز شریف دے اہداف دے عین موجب اے جئیں دا مقصد پاکستان اچ تجارت، سرمایہ کاری اتے سیاحت ودھاوݨ تے خطے اچ ابھردے اقتصادی راہداری توں چنڳاں فیدہ چاوݨا اے ۔ انہاں امید ظاہر کیتی جو الویریز اینڈ مارسل نال شراکت داری پاکستان تے ایندی معیشت سانڳے ھک خوشحال مستقبل دی بنیاد رکھیسی۔
