لاہور۔9اپریل(اے پی پی) وزیرریلوے محمد حنیف عباسی آکھیے وزیرِاعظم دی ہدایات تے پاکستان ریلوے دے نظام کوں جدید خطوط تے استوار کرݨ سانڳے وݙے پیمانے تے اقدامات چاتے ویندے پئن جنہاں اچ ریلوے دے مختلف شعبیں کوں آئوٹ سورس کرݨ، بنیادی ڈھانچے کوں اپ گریڈ کرݨ تے مسافراں کوں چنڳیاں سہولتاں ݙیوݨ شامل اے ۔ اے ڳالھ انہاں کینٹ ریلوے اسٹیشن تے ھک نویں فریٹ ریل گاݙی دی افتتاحی تقریب دے موقع تے میڈیا نال الویندیں آکھی ۔تقریب اچ سی ای او ریلوے عامرعزیز بلوچ، ڈی ایس ریلوے محمد حنیف گل و ٻئے اعلی ریلوے افسر وی موجود ہن ۔ وفاقی وزیر آکھیے پاکستان ریلوے اچ فریٹ اتے پسنجر ریل گاݙیاں دی کاکردگی چنڳی کرݨ سانڳے انہاں کوں مرحلہ وار آئوٹ سورس کیتا ویندا پئے ۔ انہاں ݙسائے ایں ویلھے 320نویاں ویگناں تیار تھی چکئن تے باقی ویگناں دی تیاری 31اگست توں پہلے مکمل کرڳھدی ویسی ،ایں توں انڄ آندے ھک سال اچ فریٹ ریل گاݙیاں دی تعداد ݙوگنا کیتی ویسی تاں جو ملک اچ تجارتی سرگرمیاں کوں ودھارا ݙتا ونڄ سڳے ۔وفاقی وزیر ݙسائے پسنجر ریل گاݙیاں دا ریونیو مسلسل ودھدا پئے جیڑھا جو ادارے دی کارکردگی اچ بہتری دا واضح ثبوت اے۔ انہاں پراعتماد لہجے اچ آکھیے 30جون توں پہلے سارے مقررہ اہداف ڳھدے ویسن ، ریلوے دی زمیناں تے قابض لوکاں دے خلاف کاروائی سانڳے پنجاب حکومت دے رلے ھک جامع پلان بݨایا ڳئے جئیں تے آندے ترائے چار ݙینھ اچ عمل درآمد شروع کرݙتا ویسی ایں پلان دے تحت ریلوے دیاں ساریاں زمیناں کوں پنجاب ماڈل دی طرز تے چھڑایا ویسی تاں جو ادارے کوں مالی طور تے مستحکم کیتا ونڄ سڳے۔ وزیرریلوے آکھیے لاہور اتے راولپنڈی ریلوے اسٹیشنز دی بہتری دے منصوبے جیڑھے 2016 توں زیر التوا ہں ہݨ پنجاب حکومت دے تعاون نال ول فعال کرݙتے ڳئن ، ریلوے لائنز دے نال ٻوٹے رہاوݨ تے لیول کراسنگز کوں چنڳاں کرݨ دے منصوبے وی آندے ترقیاتی پروگرام دا حصہ بݨا ݙتے ڳئن تاں جو ماحول دوست اتے محفوظ سفر کوں یقینی بݨایا ونڄ سڳے ۔ ھک سوال دے جواب اچ انہاں آکھیے ریلوے دے تعلیمی اتے صحت دے شعبیں اچ وی تبدیلیاں متعارف کرائیاں ویندیاں پئن ، ریلوے دے تحت چلݨ آلے 14سکولاں کوں آئوٹ سورس کیتا ویندا پئے تاں جو تعلیمی معیار کوں چنڳاں بݨایا ونڄ سڳے جݙاں جو 8 ریلوے اسپتالاں سانڳے سرمایہ کاراں دی دلچسپی گھنݨ دی غرض نال روڈ شوز کرائے ویسن ۔ انہاں مزید آکھیے 8 توں 9 پسنجرریل گاݙیاں تے فریٹ ریل گاݙیاں کوں آئوٹ سورس کرݨ دا فیصلہ کیتا ڳئے تاں جو آپریشنل استعداد اچ ودھارا تے ادارے تے مالی ٻوجھ گھٹ تھیوے ۔ انہاں آکھیے آئوٹ سورسنگ دے عمل اتے ٻئے اقدامات دے ذریعے ریلوے اچ 1.5 ارب روپے جݙاں جو اسپتالاں دے شعبے اچ ھک ارب دی بچت کیتی ویسی ۔وفاقی وزیرآکھیے ریلوے دی مسافر تے مال بردار خدمات ادارے دے ساریں توں قیمتی اثاثے ہن تے انہاں کوں 31دسمبر تئیں بہتر توں بہتر بݨا ݙتا ویسی ۔ ملکی سلامتی تے ڳالھ کریندے انہاں آکھیے دہشت گردی دے خلاف زیرو ٹالرنس دی پالیسی اپنائی ڳئی اے اتے دہشت گرداں نال کہیں وی قسم دے مذاکرات نہ کیتے ویسن۔
