اسلام آباد۔10اپریل(اے پی پی) وزیر مملکت داخلہ سینیٹر طلال چوہدری آکھیے غیرقانونی رہݨ آلے غیر ملکیاں دا انخلا جاری اے ، غیرقانونی رہݨ آلے غیر ملکیاں دے انخلا دی مدت اچ توسیع نہ تھیسی ،ہݨ تئیں غیر قانونی رہݨ آلے غیرملکیاں اتے افغان سٹیزن کارڈ رکھݨ آلے 8 لکھ 57 ہزار 157 کوں واپس اپݨے ملک اچ بھیجا ڳئے، طلال چوہدری آکھیے ملک اچ افغان سٹیزن کارڈ رکھݨ آلے شہریاں دی تعداد 8 لکھ 15 ہزار 247 پاکستان اچ رجسٹرڈ ہن تے پی او آرپروگرام پاکستان اچ 2006 توں شروع تھیا تے 2023 تئیں جاری رہیا ایں وچ 15 لکھ 69 ہزار 522 افغان شہری رجسٹرڈ تھئے ہن ۔ او پی ٹی وی ہیڈکوارٹرزاچ پریس کانفرنس توں خطاب کریندے پئے ہن ۔ وزیر مملکت داخلہ سینیٹر طلال چوہدری آکھیے سارے غیر ملکی شہری اساں کیتے قابل احترام ہن، ملک اچ دہشت گردی دے تناظر اچ انخلا دا فیصلہ کیتے۔ انہاں آکھیے 30 اکتوبر 2023 کوں غیرملکیاں دے انخلا دی پالیسی تیار کیتی ڳئی ، پہلے مرحلے اچ کاغذات نہ رکھݨ آلے غیرملکیاں کوں واپس بھیجا ڳیا ݙوجھے مرحلے اچ 13 فروری 2025 کوں افغان سیٹیزن کارڈ ہولڈرز سانڳے کابینہ فیصلہ کیتے انہاں کوں واپس بھیڄا ویسی تے انہاں سانڳے 31 مارچ 2025 دی ڈیڈلائن ݙتی ڳئی جݙاں جو تریجھے مرحلے اچ افغان کارڈ ہولڈرز کوں واپس بھیجا ویندا پئے ، انہاں آکھیے افغان شہری ساݙے بھرا ہن تے انہاں سانڳے ساݙے دل اچ ٻہوں احترام اے لیکن فیصلہ کجھ زمینی حقائق تے کرݨا پئے ، ایں ویلھے پاکستان اچ جیڑھی دہشت گردی تھیندی پئی اے ایں دے ٻہوں سارے واقعات افغان شہریاں نال جڑئن ۔ انہاں ݙسائے ایں توں انڄ ملک اچ نارکوٹکس دی وݙی کھیپ یا سپلائی افغانستان توں آندی اے تے او پیسہ کہیں نہ کہیں طرح دہشت گردی نال جڑیا ہویا اے تے اساں افغان شہریاں کوں واپس بھیڄݨ دا فیصلہ پاکستان دے مفاد اچ کیتے ۔سینیٹر طلال چوہدری آکھیے غیر قانونی غیر ملکیاں کوں واپس بھیجݨ متعلق ٻہوں سارے شکوک و شہبات پیدا کرݨ دی کوشش کیتی ویندی پئی اے تاں جو وزارت داخلہ سارے صوبیں کوں ایں معاملے تے آن بورڈ ڳھدے ، ون ڈاکومنٹ رجیم دا آغاز کیتے جیویں کہیں وی ملک توں کوئی بندہ پاکستان آسڳدے ، کاروبار کرسڳدے ، رہائش اختیار کرسڳدے بلکل ایویں افغان شہری وی ہݨ ویزا تے پاکستان آسڳدن تے جتنے لوکاں کوں اساں بھڄیندے پیوں او وزیر بݨوا تے آون قانونی ڈاکومنٹس دے بعد پاکستان اچ آتے رہن ، پاکستان اچ ہݨ غیر قانونی طورتے رہݨ دی کوئی گنجائش کائنی ، جݙاں فیصلہ کیتا ڳئے تاں سارے صوبیں اچ ٹرانزٹ پوائنٹس بݨائے ڳئے، جتھاں افغان شہریاں کوں نہ صرف رہائش ݙتی ڳئی بلکہ انہاں دے کھاوݨ پیوݨ دا بندوبست وی کیتا ڳیا۔وزیر مملکت داخلہ آکھیے حکومت دا فیصلہ اے جوون ڈاکومنٹ رجیم تے مکمل عملدرآمد کیتا ونڄے او افغانستان دے شہری ہوون یا کہیں ٻئے ملک دے ، جیویں مغرب دا بارڈر اے اوویں ہی مشرق دی سرحد کوں وی ریگولیٹ کریسوں ، 2600 کلومیٹر دی اے لمبی سرحد ٻہوں اوکھی اے کیوں جو دہشت گردی اتھوں تھیندی اے ، وزارت خارجہ ایں معاملے تے افغان حکومت نال رابطے وچ ہے تے جتنے وی شہری واپس بھیڄے ویندن انہاں دا پورا ھک طریقہ کار اے ، انہاں دی رجسٹریشن اساں کنوں وی تھیندی اے تے انہاں دی طرفوں وی کیتی ویندی اے۔
