راولپنڈی ؍اسلام آباد۔ 16 مئی (اے پی پی) صدر مملکت آصف علی زرداری آکھیا جو اسا کوں آپݨے بہادر جواناں دی قربانیاں تے فخر اے، ساری قوم اپݨے سپاہیاں دی قربانیاں کوں سلام پیش کریندی اے، شہیداں اتے انہاں دے خانداناں دیاں قربانیاں دے ہمیشہ معترف رہسوں۔ صدر مملکت جمعہ کوں بھارت دے خلاف معرکہ حق اچ شہید تھیوݨ آلے اسکواڈرن لیڈر عثمان یوسف شہید دے گھر ڳئے۔ ایوان صدر دے پریس ونگ توں جاری بیان موجب سکواڈرن لیڈر عثمان یوسف شہید دے گھر آوݨ دے موقع تے صدر مملکت شہید دے والد اتے خاندان دے ٻئے لوکاں نال تعزیت کیتی۔ صدر مملکت شہید دی وطن کیتے خدمات اتے دفاع وطن اچ جان دا نذرانہ پیش کرݨ تے قوم ولوں انہاں کوں شاندار خراج عقیدت پیش کیتا۔ ایں موقع تے صدر مملکت آکھیا جو اساکوں آپݨے بہادر جواناں دی قربانیاں تے فخر اے، پوری قوم اپݨے سپاہیاں دی قربانیاں کوں سلام پیش کریندی اے، اساں آپݨے شہیداں اتے انہاں دے خانداناں دیاں قربانیاں دے ہمیشہ معترف رہسوں۔ صدر آصف علی زرداری شہید کیتے فاتحہ خوانی اتے بلندی درجات دی دعا کیتی۔ انہاں شہید دے لواحقین نال ہمدردی کیتی اتے انہاں کیتے صبر جمیل دی دعا کیتی۔
