اسلام آباد۔16 مئی (اے پی پی)وزیراعظم محمد شہباز شریف آکھیے جو اساں دشمن دے منہ تے اینجھا تھپڑ ماریا جو او کݙاہیں نہ بھُلسی، بھارت ساݙی تحقیقات دی پیشکش دے باوجود پاکستان تے حملہ کیتا اتے معصوم شہریاں کوں نشانہ بݨایا، امن پسند ہمسائیں وانگوں جموں کشمیر سمیت ٻئے مسئلیاں کوں ڳالھ مہاڑ نال حل کرݨا ہوسی، خطے اچ پائیدار امن کیتے مسئلہ کشمیر دا حل لازمی اے۔ اے ڳالھیں انہاں یوم تشکر سانڳے یادگار پاکستان تے خصوصی تقریب نال خطاب اچ آکھین۔ تقریب اچ وفاقی وزراء اسحاق ڈار، خواجہ محمد آصف، عطاء اﷲ تارڑ، محسن نقوی، وفاقی کابینہ دے ٻئے ارکان، سول اتے عسکری حکام اتے مختلف ملکاں دے سفراء شریک تھئے۔ تقریب اچ چیئرمین جوائنٹ چیفس آف سٹاف کمیٹی جنرل ساحر شمشاد مرزا اتے سروسز چیفس وی شریک تھئے۔ تقریب اچ وطن عزیز تے جان ݙیوݨ آلے عظیم شہداء دے والدین اتے اہلخانہ وی موجود ہن۔ وزیراعظم محمد شہباز شریف آکھیا جو وطن عزیز تے جان ݙیوݨ آلے شہداء اتے انہاں دے اہلخانہ کوں سلام پیش کریندے ہیں، اساں اڄوکے ݙینھ یوم تشکر منیندے پئے ہیں، اے ݙینھ دنیا دی تاریخ اچ ہمیشہ یاد رکھیا ویسی، اینجھا ݙینھ صدیاں بعد آندے۔ اے اﷲ تعالیٰ دا بے پایاں فضل و کرم اے، اڄ توں 50 سال پہلے 1971ء اچ ہک ݙکھ ݙیوݨ آلا واقعہ پیش آیا ہا، اڄ 2025ء اچ ﷲ تعالیٰ دے کرم اتے قوم دی دعاواں نال افواج پاکستان دے دلیر سپوت کامیاب تھئے جیندے نال دشمن ولا پاکستان دو منہ کرݨ دا قیامت تئیں نہ سوچ سڳسی۔ انہاں آکھیا جو دشمن ساݙی انتہائی مخلصانہ پیشکش کوں ٹھکرا ݙتا جیندے اچ اساں آکھیا ہا جو پہلگام واقعے دی تحقیقات کیتے عالمی تحقیقاتی کمیٹی بݨیندے ہیں جیڑھی پوری تحقیقات دے بعد پوری دنیا کوں حقائق ݙس ݙیسی، ٻھل دشمن انتہائی تکبر آلے انداز اتے غرور دے نشے اچ بدمست تھی تے پاکستان تے حملہ کر ݙتا اتے بے گناہ پاکستانیاں کوں شہید کیتا جیندے اچ معصوم ٻال، تریمتیں اتے جوان شہید تھئے اتے پاکستان کوں اے سنیہا ݙتا جو اساں پاکستان دے اندر ونڄ تے حملہ آور تھی سڳدے ہیں۔ انہاں آکھیا جو 9 مئی دی رات اساں دشمن دے 6 جہاز ݙھوا ݙتے ہن، پہلے پنج جہازاں دی ڳالھ ہئی ٻھل ہݨ 6 جہاز تباہ تھیوݨ دی تصدیق تھی ڳئی اے۔ ساݙا اے دشمن جنوبی ایشیاء اچ آپ کوں تھانیدار سمجھدا ہا اتے او ایں بھلیکھے اچ ہا جو پاکستان اوندے سامݨے حیثیت نئیں رکھدا، ﷲ تعالیٰ پاکستان دے انہاں شاہیناں کوں ہمت ݙتی انہاں جھپٹ جھپٹ تے دشمن دے رافیل سودھا ٻئے طیارے ݙھوائے اتے اینجھا ݙراکلا خواب ݙکھایا جو او قیامت تئیں ایندے توں نہ نکل سڳسن۔ انہاں آکھیا جو ایندے بعد وی دشمن دھمکیاں ݙیندا ریہے اتے 9 مئی کوں اساں نپیا تلا جواب ݙیوݨ دا فیصلہ کیتا، 9 اتے 10 مئی دی ادھلی رات سپہ سالار جنرل سید عاصم منیر ݙسایا جو بھارت نورخان ایئربیس سودھا ٻنھاں جاہیں تے بیلسٹک میزائل نال حملہ کیتے۔ انہاں آکھیا جو آرمی چیف جنرل سید عاصم منیر پراعتماد ہن، انہاں اچ خود داری اتے وطن نال محبت دی تڑپ ہئی، انہاں دشمن دے منہ تے اینجھا تھپڑ مارݨ دی اجازت منڳی جیڑھا عمر بھر انہاں یاد رہسی، ایندے بعد پاکستانی شاہیناں پٹھان کوٹ، اودھم پور سودھا ٻئے بھارتی تنصیبات تے الفتح میزائل نال حملے کیتے اتے دشمن کوں لُکݨ دی جاہ وی نہ ملی۔ انہاں آکھیا جو لمحہ بہ لمحہ صورتحال ڄاݨݨ کیتے فوجی حکام نال رابطے اچ ہامی، آرمی چیف جنرل سید عاصم منیر سویرے سویرے بھارت کوں جواب ݙیوݨ اتے بھارت ولوں سیز فائر دی درخواست دا ݙسایا، ایں توں ودھ عزت دی کیا ڳالھ تھی سڳدی اے، اساں دشمن کوں بھرپور تھپڑ ماریے، میں انہاں کوں سیز فائر دی پیشکش قبول کرݨ کیتے آکھیا۔ شہباز شریف آکھیا جو پاک فضائیہ دے سربراہ اتے شاہیناں جیویں جدید ٹیکنالوجی اتے چینی جہازاں توں فائدہ گھدے ایندے نال پوری دنیا حیران تھی ڳئی اے، دشمناں دے ہوش اُݙ ڳئے ہن اتے دوستاں دا اعتماد اتے حوصلہ ودھ ڳئے، اے تاریخ دی او تبدیلی اے جیڑھی اﷲ تعالیٰ کڄھ گھنٹیاں اچ پاکستان کوں کامیابی دی صورت اچ ݙتی، امریکہ توں گھن تے جاپان تئیں، جنوبی ایشیا، مشرق وسطیٰ، یورپ اتے ہر جاہ اے ڳالھ تھیندی پئی اے جو پاکستان دی افواج ایں طریقے اتے خاموشی نال اے کامیابی حاصل کیتی اے۔ انہاں آکھیا جو بھارت دنیا کوں اے جتویندا پیا ہا جو ایں دی ارباں ڈالر دی معیشت اتے اسلحے دا انبار اے اتے پاکستان اوندے سامݨے کوئی حیثیت نئیں رکھدا اتے میکوں ایں خطے دا بادشاہ منیا ونڄے، پر اﷲ کوں کجھ ٻیا منظور ہا، پاکستان دے 24 کروڑ عوام دیاں دعاواں رنگ گھنائیاں اتے اے عظیم فتح حاصل تھئی، اڄ یوم تشکر دے موقع تے ساݙے سر ﷲ تعالیٰ دے حضور جھکیے ہوئے ہن۔ انہاں آکھیا جو اڄ پاکستان کوں ﷲ تعالیٰ او مقام ݙتے جو ہݨ کوئی وݙی توں وݙی طاقت ساݙا رستہ نئیں روک سڳدی، پشاور توں کراچی تئیں پوری قوم اڄ ہک جان ݙو قالب اے، پوری قوم ساݙی مسلح افواج دے پچھو کھڑی اے اتے پوری طاقت نال انہاں دا ساتھ ݙیندی پئی اے۔ انہاں آکھیا جو ہݨ او ویلا آ ڳئے جو ایں سفر دا آغاز کر ݙیوݨا چاہیدے جیندے کیتے پاکستان وجود اچ آیا ہا، قائداعظم محمد علی جناح دی عظیم تحریک اچ لکھاں مسلماناں آپݨیاں جاناں دا نذرانہ پیش کیتا، خون دے دریا پار کیتے جیندے بعد پاکستان وجود اچ آیا، اڄ انہاں لکھاں شہیداں دیاں روحاں پکار پکار تے ایہ ڳالھ کریندیاں پئیاں ہن جو آؤ پاکستانیاں رل تے قائداعظم اتے علامہ اقبال دا پاکستان بݨاؤ، قیام پاکستان دا مقصد اقوام عالم اچ پاکستان دے سبز ہلالی پرچم کوں اُچا کرݨا ہا، اساں ماضی کوں بھُل تے اڳوں ودھݨا ہے، اڄوکی قومی یکجہتی اتے بھائی چارے کوں زندگی دا سرمایہ بݨا تے نہ صرف ماضی دے نقصاناں دا ازالہ تھیسی بلکہ پاکستان ٻہوں جلد اقوام عالم اچ اپݨا جائز مقام حاصل کر گھنسی، اے ایویں تھیسی جیویں 10 مئی کوں تھیا ہا۔ انہاں آکھیا جو اساں معاشی میدان اچ ایہو جھیاں عزم کرݨا ہوسی اتے ایندے کیتے قوم تیار اے، اساکوں ݙینھ رات محنت کرݨی ہوسی اتے خون پسینہ وہاوݨا ہوسی۔ انہاں آکھیا جو بھارت پہلگام واقعے دے بعد پاکستان تے بے بنیاد الزام لائے، ایں اوکھے ویلے اچ امن، جنگ بندی اتے کشیدگی دے خاتمے کیتے کوشش کرݨ آلے دوست ملکاں سعودی عرب، متحدہ عرب امارات، کویت، ایران، ترکیہ، چین اتے ٻئے ملکاں دا شکرگزار ہیں، امریکی صدر ڈونلڈ ٹرمپ دی بہادرانہ قیادت اتے وژن نال جنوبی ایشیاء اچ فوری امن قائم تھیا اتے اے خطہ خطرناک جنگ توں محفوظ ریہا جیندے تے انہاں دا شکرگزار ہیں، ایں خطہ اچ 1.6 ارب لوک رہندن، ڄیکر ݙوہاں جوہری ملکاں دے درمیان جنگ تھیندی تاں انہاں دا کیا تھیندا؟، اساں امن دے خواہشمند ہئیں پر جارحیت دی مذمت کریندے ہئیں، اساں امن پسند ہمسائیں وانگوں رہ تے ایں خطے دی ترقی و خوشحالی چاہندے ہئیں، پاکستان ہمیشہ خطے اچ امن کیتے کم کیتے، ݙوہاں ملکاں دے درمیان ترائے جنگاں تھیاں جیندے نال غربت اتے بے روزگاری ودھ ڳئی، ساکوں پرامن ہمسائیں وانگوں جموں کشمیر سمیت اپݨے مسئلیاں کوں ڳالھ مہاڑ نال حل کرݨا چاہیدے، مسئلہ جموں کشمیر دے پائیدار حل دے بغیر خطے اچ پائیدار امن قائم نئیں تھی سڳدا، اساں انسداد دہشت گردی اتے تجارت دے ودھارے سودھا ٻئے شعبیاں اچ تعاون کوں ودھا سڳدے ہئیں، پاکستان سب توں ودھ دہشت گردی توں متاثر ملک اے، ڄیکر ساݙی بہادر مسلح افواج انہاں دہشت گرداں کوں نہ روکینداں تاں پوری دنیا کوں ایندا سامݨا کرݨا پوندا۔ ایں موقع تے مسلح افواج دے چاق و چوبند دستے وزیراعظم کوں سلامی ݙتی۔ تقریب اچ پاک فضائیہ دے شاہیناں خصوصی فلائی پاسٹ دا مظاہرہ کیتا۔ شرکاء بھرپور انداز اچ تاڑیاں اتے پاکستان زندہ باد دے نعریاں نال انہاں دا استقبال کیتا۔
