آپریشن بنیان مرصوص اچ تاریخی فتح تے پاکستان نیشنل کونسل آف دی آرٹس اچ یوم تشکر منایا ڳیا

اسلام آباد۔ 17 مئی (اے پی پی) پاکستان نیشنل کونسل آف دی آرٹس (پی این سی اے) اچ بھارت دی جارحیت دے خلاف آپریشن بنیان مرصوص اچ تاریخی کامیابی دے حوالے نال یوم تشکر دی تقریب اچ عوام اتے افواج پاکستان کوں خراج تحسین پیش کیتا ڳئے۔ پی این سی اے توں جاری پریس ریلیز موجب تقریب دا آغاز تلاوت کلام پاک اتے قومی ترانے نال تھیا۔ ایں موقع تے مقررین اللہ رب العزت دے حضور سجدہ شکر ادا کریندے آکھیے جو اے محض عسکری کامیابی کائنی بلکہ پوری قوم دی یکجہتی، قربانی اتے عزم دی فتح اے۔ مقررین دا آکھݨ ہا جو لکھ واری شکر اے اللہ تعالیٰ دا جیں ہک واری ول حق کوں باطل تے غالب کیتا۔ تقریب نال خطاب کریندے ڈی جی پی این سی اے محمد ایوب جمالی وطن عزیز دے تحفظ کیتے جاناں قربان کرݨ آلے شہیداں کوں خراج عقیدت پیش کیتے اتے آکھیے جو قوم ہمیشہ انہاں سپاہیاں دیاں قربانیاں کوں یاد رکھیسی جنہاں دھرتی ماء دے وقار کیتے اپݨیاں جاناں دا نذرانہ پیش کیتے۔ تقریب دے مہمان خصوصی وفاقی وزیر قومی ورثہ و ثقافت اورنگزیب خان کھچی اتے پارلیمانی سیکرٹری قومی ورثہ و ثقافت فرح ناز ہن۔ مہمانان گرامی تقریب نال خطاب کریندے ہوئے ایں تاریخی ݙینھ کوں ملکی تاریخ دا روشن باب قرار ݙتا اتے آکھیے جو اے کامیابی پوری قوم دے اتحاد، حب الوطنی اتے پاک فوج دی پیشہ ورانہ صلاحیتاں دا مظہر اے۔ ایں موقع تے ملک دے نامور فنکاراں ملی نغمے پیش کرتے تقریب کوں چار چندر لا ݙتے۔ فنکاراں دی پرفارمنس شرکاء دے دل جت ڳھدے اتے حاضرین دی طرفوں “پاکستان زندہ باد” اتے “پاک فوج زندہ باد” دے نعریں نال گونج اٹھیا ۔ تقریب اچ اسلام آباد اتے راولپنڈی نال تعلق رکھݨ آلے شہریاں وݙی تعداد اچ شرکت کیتی۔