اسلام آباد۔17 مئی(اے پی پی) وفاقی وزیر سائنس و ٹیکنالوجی خالد حسین مگسی وفاقی وزیر تجارت جام کمال خان نال مِلئے، ملاقات اچ مُلک دی برآمدات ودھاوݨ اتے سائنس دے شعبے اچ رَل مِل تے کم کرݨ تے ڳالھ مُہاڑ تھئی۔ایں موقع تے وفاقی سیکرٹری سائنس و ٹیکنالوجی ساجد بلوچ اتے ٻئے افسر وی موجود ہَن۔ وزارت سائنس و ٹیکنالوجی ولوں جاری اعلامیے موجب ملاقات اچ ݙوہیں وزیراں ایں ڳالھ تے اتفاق کیتا جو پاکستان دی برآمدی سکت کوں ودھاوݨ کیتے وزارت سائنس و ٹیکنالوجی اتے وزارت تجارت دا رَل مِل تے کم کرݨ ٻہوں ضروری اے۔ ایں حوالے نال سرجیکل آلات اتے ٻئی مصنوعات دی برآمدات کوں ودھاوݨ کیتے لیبارٹری سہولتاں کوں نویں اتے عالمی معیار دے موجب چنڳاں کیتا ویسی۔وفاقی وزیر سائنس و ٹیکنالوجی خالد حسین مگسی آکھیے جو وزیراعظم پاکستان دے وژن موجب سائنس اتے تجارت دا رَلݨ مُلک دی معیشت دی ترقی کیتے ٻہوں اہم اے، ݙوہیں وزارتاں رَل تے تجویزاں تے کم شروع کریسن تاں جو برآمدات اچ ودھارا تھی سڳے۔ وزیر تجارت جام کمال خان وی ایں حوالے نال ہر طرح دی مدد دا یقین ݙیوائے۔ ایں موقع تے وفاقی سیکرٹری سائنس و ٹیکنالوجی ساجد بلوچ آکھیے جو نویں تحقیق اتے چنگی جانچ پڑتال دے ذریعے پاکستان دی برآمدی مصنوعات کوں عالمی منڈی اچ ٻئے مُلکاں دی مصنوعات دے مقابلے اچ چنڳاں بݨایا ونڄ سڳدے۔ ݙوہیں وزیراں مُلخ دی ترقی، آپݨے پیریں تے کھڑݨ اتے برآمدات کوں ودھاوݨ کیتے رَل تے حکمت عملی تے عمل کرݨ دے عزم دا وی اظہار کیتے۔
