سنگاپور ۔18 مئی (اے پی پی) سنگاپور پاکستانی ہائی کمیشن وِچ حق دے تاریخی معرکے دی فتح تے پاک فوج دی اٹل ہمت اتے پاکستانی عوام دے حوصلے کوں خراجِ تحسین پیش کرݨ کیتے یومِ تشکر منایا ڳیا۔ پاکستانی کمیونٹی دے 60 توں ودھ لوکاں تقریب وِچ شرکت کیتی اتے بہادر پاکستانی فوجیاں دی ہمت اتے عوام دے جذبے دی تعریف کیتی۔ اتوار کوں اِتھاں پریس ریلیز موجب ایں موقع تے ہائی کمشنر رابعہ شفیق اپݨے خطاب وِچ بھارتی فوج دی اڄوکی جارحیت دے دوران بہادری نال وطنِ عزیز دا دفاع کرݨ تے پاک فوج دی بہادری اتے قربانیاں کوں زبردست خراجِ تحسین پیش کیتا۔ اُنھاں پاک فوج دے اٹل عزم دی تعریف کریندے پاکستان دے ردِعمل کوں بھارت دی بلا اشتعال اتے گمراہ کن فوجی مہم جوئی دے خلاف طاقت دا شاندار مظاہرہ قرار ݙتا۔ ہائی کمشنر شرکاء کوں اپریشن بنیان مرصوص دی اہمیت اتے شاندار کامیابی دا ݙسایا ڳئے جئیں نہ صرف جنوبی ایشیا وِچ طاقت دا توازن بحال کیتا بلکہ قابلِ اعتماد ڈیٹرنس کوں وی تکڑا کیتے۔ ہائی کمشنر اڄوکی کشیدگی دے دوران مُلک توں ٻاہررہݨ آلیں سودھے پوری قوم دے اتحاد دی تعریف کیتی۔ اُنھاں عالمی برادری دے سامݨے پاکستان دا مقدمہ مؤثر انداز وِچ پیش کرݨ اتے پاکستان کوں بدنام کرݨ کیتے بھارت دے کوڑے پروپیگنڈے کوں بے نقاب کرݨ کیتے پاکستان دی بھرپور سفارتی کوششاں کوں اُجاگر کیتا۔ اُنھاں ایں ڳالھ تے زور ݙتا جو پاکستان پرامن بقائے باہمی کیتے پُرعزم اے اتے صرف اپݨے دفاع وِچ دوراندیشی، تحمل اتے منصوبہ بندی نال کارروائی کریندے، جئیں دا ہدف صرف فوجی تنصیبات ہوندیِن۔ اُنھاں شرکاء کوں سندھ طاس معاہدے کوں غیر قانونی طور تے مُعطل کرتے پاݨی کوں ہتھیار بݨاوݨ دے بھارت دے مذموم ارادیں اتے پاک سرزمین تے دہشت گردی دی سرپرستی کر تے پاکستان کوں غیر مستحکم کرݨ دیاں کوششاں دا وی ݙسائے ۔ اُنھاں آکھیے جو بین الاقوامی برادری کوں مقبوضہ جموں و کشمیر جھیڑے دے حل سانڳے پاکستان اتے بھارت نال رَل تے کم کرݨا چاہیدےاتے بھارت تے زور ݙیواوݨا چاہیدے جو او اقوام متحدہ دی سلامتی کونسل دیاں متعلقہ قرارداداں موجب جھیڑا کشمیر دے پرامن حل کیتے اپݨے وعدے تے عمل کرے۔ کمیونٹی دے لوکاں زنانیاں اتے ٻالاں سودھے نشوم شہریاں کوں نشانہ بݨاوݨ تے بلا اشتعال بھارتی جارحیت دے خلاف پاکستان دی خودمختاری دا بھرپور دفاع کرݨ تے پاک فوج دا شکریہ ادا کریندے ماݨ دا اظہار کیتا۔ تقریب دے چھیکڑ وِچ شہیداں، مسلح فوج دے جواناں اتے زخمیاں دی وختی صحت یابی سانڳے دعا منڳی ڳئی۔
