ترجمان دفتر خارجہ دی آپریشن “بنیان مرصوص” اچ شاہین میزائل دے استعمال بارے بھارتی میڈیا دے بے بنیاد دعویاں دی تردید

اسلام آباد۔19 مئی (اے پی پی)پاکستان آپریشن “بنیان مرصوص” اچ شاہین میزائل دے استعمال بارے بھارتی میڈیا دے بے بنیاد دعویاں کوں سختی نال مسترد کر ݙتے۔ ترجمان ایں سانڳے بھارتی میڈیا دے بے بنیاد دعویاں دے ولدے اچ آکھیے جو وزارت خارجہ ہندوستانی میڈیا دے کڄھ حصیاں اچ آوݨ آلے انہاں بے بنیاد الزامات کوں سختی نال مسترد کریندے جیندے اچ کوڑا دعویٰ کیتا ڳئے جو پاکستان آپریشن’’ بنیان مرصوص ‘‘ اچ شاہین میزائل استعمال کیتے۔ ترجمان آکھیے جو اے دعوے بھارتی فوج دے آفیشل ٹویٹر ہینڈل توں ہک ویڈیو دے اجراء دے بعد شروع تھئن جیندے اچ مبینہ طور تے پاکستان دے شاہین میزائل دا استعمال ݙکھایا ڳئے۔ ترجمان آکھیے جو اے سمجھدے ہوئے جو اے دعویٰ بے بنیاد اے، بھارتی فوج فوری طور تے گمراہ کن ویڈیو اݙا ݙتی ٻھل اوں ویلھے تئیں بھارتی میڈیا دے کجھ حصے پہلے ہی بغیر تصدیق دے ایں کوڑے بیانے کوں اڳو تے ودھا چکیے ہن۔ ترجمان دفتر خارجہ افسوس کیتے جو کجھ ہندوستانی میڈیا ادارے ایں ڈس انفارمیشن دا پرچار کریندے پئن، اے ݙسݨ ضروری اے جو بھارتی فوج دا آفیشل ہینڈل ایں معاملے تے چپ اے جݙاں جو انہاں غلط پوسٹ دی نا تاں وضاحت کیتی اے اتے نا ہی ایندی تردید کیتی اے۔ تجزیہ کاراں دا مشاہدہ اے جو اینڄھی ڈس انفارمیشن مہمات آپریشن “سندور” اچ بھارت دیاں ناکامیاں کوں ڄاݨ ٻڄھ تے لکاوݨ دی کوشش دا حصہ ہن جیہڑا پاکستان دی روایتی فوجی صلاحیتاں ݙکھاوݨ دا نتیجہ ہئی۔ ترجمان آکھیا جو پاکستان ولوں استعمال تھیوݨ آلے ہتھیاراں دی رینج آئی ایس پی آر دی 12 مئی 2025ء دی پریس ریلیز اچ تفصیل نال بیان کیتی ڳئی اے۔ پاکستان دی مسلح افواج پریسیزن گائیڈڈ، لمبے فاصلے تئیں مار کرݨ آلے الفتح سیریز دے میزائل ایف 1 اتے ایف 2 دے نال نال جدید گولہ و بارود، انتہائی باصلاحیت لانگ رینج لوئٹرنگ کلر ڈرون اتے لمبے فاصلے تئیں مار کرݨ والی آرٹلری دا استعمال کیتا۔ انہاں ہتھیاراں نال ہندوستان اتے بھارت دے غیر قانونی زیر تسلط جموں و کشمیر اچ جنہاں فوجی مقامات کوں نشانہ بݨائے او وی 12 مئی دی آئی ایس پی آر دی پریس ریلیز اچ ݙسایاں ڳن۔ ترجمان نے آکھیا جو غیر تصدیق شدہ اتے اشتعال انگیز مواد کوں کھنݙاوݨ نہ صرف علاقائی استحکام کیتے نقصان دہ اے ٻھل اے سرکاری اداریاں دی ناقص پیشہ ورانہ صلاحیت دا وی غماز ہے۔