ویلھے تے اتے موثر انصاف اخلاقی ذمہ داری اے، چیف جسٹس آف پاکستان

اسلام آباد۔19 مئی(اے پی پی)چیف جسٹس آف پاکستان جسٹس یحییٰ آفریدی عدلیہ ولوں قانونی چارہ جوئی کوں اصلاحات دے محور اچ رکھݨ تے زور ݙیندے آکھیے جو ویلھے تے اتے موثر انصاف ہک اخلاقی ذمہ داری اے۔ سپریم کورٹ دے شعبہ تعلقات عامہ دے جاری اعلامیہ دے مطابق چیف جسٹس آف پاکستان جسٹس یحییٰ آفریدی اے ڳالھ سپریم کورٹ آف پاکستان اچ چوتھے انٹرایکٹو سیشن دی صدارت کریندے آکھی۔ سیشن اچ اعلیٰ حکام، سٹیک ہولڈرز اتے سپریم کورٹ دے افسران دے نال عدالتی اصلاحات تے پیش رفت دا جائزہ گھدا ڳیا جیندا مقصد خدمت دی فراہمی کوں بہتر بݨاوݨ اتے انصاف تئیں رسائی کوں ودھاوݨ اے۔ سیشن اچ سپریم کورٹ دے رجسٹرار محمد سلیم خان، پیرس توں آن لائن ڈویلپمنٹ ماہر شیر شاہ، ہمایوں ظفر آئی ٹی ایکسپرٹ، فیڈرل جوڈیشل اکیڈمی دے ڈائریکٹر جنرل حیات علی شاہ اتے سیکرٹری لاء اینڈ جسٹس کمیشن آف پاکستان (ایل جے سی پی) سیدہ تنزیلہ صباحت اتے سیکشن دے سربراہان شرکت کیتی۔ ایں موقع تے چیف جسٹس یحییٰ آفریدی اصلاحات اڳو تے ودھاوݨ اچ سپریم کورٹ دے افسران اتے سٹیک ہولڈرز دیاں اجتماعی کوششاں کوں سراہیا۔ انہاں ای فائلنگ سسٹم دے کامیاب نفاذ دے پچھو ٹیماں دی لگن دی تعریف کیتی جیندے نال ملک بھر اچ کیس مینجمنٹ دی کارکردگی ودھی اے۔ سپریم کورٹ دے آئی ٹی ڈائریکٹوریٹ وی جدید ڈیجیٹل انضمام بارے اڳونہی ݙتی جنہاں اچ ریئل ٹائم کیس ٹریکنگ کیتے پبلک پورٹلز شامل ہن جیندا مقصد شفافیت اتے رسائی ودھاوݨ اے۔ چیف جسٹس اعادہ کیتا جو جاری اقدامات بشمول عدالتی عمل دی ڈیجیٹلائزیشن اتے ہموار طریقہ کار نہ صرف زیر التواء کیسز اچ کمی بھل موثر احتساب نال عوامی اعتماد برقرار رکھݨ کیتے ڈیزائن کیتا ڳئے۔ سیشن دا اختتام چیف جسٹس یحییٰ آفریدی دے جدت، شمولیت اتے تعاون کوں ترجیح ݙیوݨ دے عدلیہ دے عزم دی توثیق نال تھیا۔ انہاں سارے شرکا بشمول عدالتی افسران، تکنیکی ماہرین اتے پالیسی مشیراں دے تعاون دی تعریف کیتی۔