وفاقی وزیر موسمیاتی تبدیلی اَتے ماحولیاتی رابطہ نال چیئرمین نیشنل ڈیزاسٹر مینجمنٹ اتھارٹی دی ملاقات، مون سون سیزن دیاں تیاریاں دا جائزہ گھدا ڳیا

اسلام آباد (اے پی پی) وفاقی وزیر موسمیاتی تبدیلی اَتے ماحولیاتی رابطہ ڈاکٹر مصدق ملک نال نیشنل ڈیزاسٹر مینجمنٹ اتھارٹی (این ڈی ایم اے) دے چیئرمین لیفٹیننٹ جنرل انعام حیدر ملک اعلیٰ سطحی ملاقات کیتی، جیندے اچ ملک اچ ودھدے ہوئے درجہ حرارت اَتے ممکنہ سیلاب دے خطرے پاروں نظر آوݨ آلے مون سون سیزن دیاں تیاریاں دا جائزہ گھدا ڳیا۔ منگل کوں وزارت موسمیاتی تبدیلی توں جاری بیان موجب چیئرمین این ڈی ایم اے وفاقی وزیر کوں اڄوکے درجہ حرارت دی صورتحال اَتے چھل دی ممکنہ پیشنگوئیاں دا ݙسیا۔ انہاں ݙسیا جو ایں سال معمول توں ودھ درجہ حرارت متوقع اے اَتے شمالی علاقیاں اچ درجہ حرارت اچ ودھارے پاروں گلیشیئرز دے پگھلݨ دی رفتار تیز تھیوݨ دا خطرہ اے جو دریائے سندھ اچ سیلاب دا سبب بݨ سڳدے۔ ملاقات وچ این ڈی ایم اے ولوں استعمال کیتے ویندے ترائے سطحی پیشگی انتباہی نظام تے وی تفصیلی ڳالھ مہاڑ تھئی جیندے اچ موسمیاتی پیشنگوئی، مشاورتی انتباہ اَتے حتمی تصدیقی آؤٹ لک شامل ہن۔ ایہہ نظام خطرات دی ویلھے تے شناخت اَتے مؤثر حفاظتی اقدامات دی منصوبہ بندی کوں ممکن بݨیندے۔ ایں توں علاوہ موسمیاتی اَتے ماحولیاتی عوامل تے وی تکنیکی بریفنگ ݙتی ڳئی جنہاں دا مون سون سیزن تے براہ راست اثر پوندے جنہاں وچ زمین اَتے سمندر دے درجہ حرارت اچ فرق، سمندر دی سطح دا درجہ حرارت اَتے شمالی نصف کرے وچ برفباری دا پھیلاؤ شامل ہن۔ ملاقات اچ ڈیٹا تے مبنی پیشنگوئیاں اَتے ادارہ جاتی ہم آہنگی دی اہمیت تے زور ݙتا ڳیا۔ ملاقات دے ہک انڄ سیشن اچ مقامی سطح تے آفتاں توں بچاؤ دی حکمت عملی تے ڳالھ مہاڑ کیتی ڳئی۔ ایں موقع تے وفاقی وزیر آکھیا جو موسمیاتی مطابقت دراصل آفتاں توں بچاؤ اے۔ انہاں سانجھے مالی تعاون اَتے مربوط منصوبیاں دی لوڑھ تے زور ݙتا۔ فریقین زیر التوا اَتے نامکمل منصوبیاں تے وی ڳالھ مہاڑ کیتی اَتے مسئلیاں دی نشاندہی اَتے تکمیل کیتے ہک مؤثر فریم ورک تیار کرݨ تے اتفاق کیتا۔ ایہہ فیصلہ وی کیتا ڳیا جو آئندہ مربوط اجلاس کیتا ویسی جیندے اچ نیشنل ڈیزاسٹر مینجمنٹ اتھارٹی، ضلعی ڈیزاسٹر مینجمنٹ اتھارٹیز، پاکستان محکمہ موسمیات اَتے متعلقہ منصوبیاں نال جڑیے ادارے شریک تھیسن تاں جو اڄوکے منصوبیاں دی بروقت تکمیل اَتے مستقبل دے مشترکہ منصوبیاں کیتے حکمت عملی تیار کیتی ونڄ سڳے ۔ بیان موجب وزارت موسمیاتی تبدیلی اَتے ماحولیاتی ہم آہنگی ماحولیاتی چیلنجز دے تناظر وچ شفاف، فعال اَتے باہمی اشتراک تے مبنی منصوبہ بندی دے عزم تے قائم اے۔