خضدار اچ سکول بس تے حملے کرݨ آلے دہشت گرداں کوں انجام تئیں پڄا تے ساہ گھنسوں، وزیراعظم

اسلام آباد۔21مئی (اے پی پی) وزیراعظم محمد شہباز شریف بلوچستان دے ضلع خضدار اچ بھارتی سرپرستی اچ کم کرݨ آلے دہشت گرداں دے سکول بس تے بزدلانہ حملے دی شدید مذمت کریندیں ہوئیں آکھیا جو دہشت گرداں سکول بس تے حملہ کر تے درندگی دیاں ساریاں حداں پار کر ݙیتن، انہاں کوں انجام تئیں پڄا تے ساہ ڳھنسوں۔ بدھ کوں وزیراعظم آفس دے میڈیا ونگ توں جاری بیان موجب وزیرِ اعظم حملے دا نشانہ بݨݨ آلے بالاں دے والدین دے نال ہمدردی دا اظہار کریندیں ہوئیں معصوم بالاں اتے استاداں دی شہادت تے ݙکھ تے افسوس کیتا۔ انہاں واقعے دے ذمہ واراں دا فوری پتہ کرݨ اتے قرار واقعی سزا ݙیواوݨ دی ہدایت کیتی۔ وزیراعظم واقعے اچ زخمیاں کوں فوری طبی امداد دی فراہمی یقینی بݨاوݨ دی وی ہدایت کیتی۔ وزیراعظم آکھیا جو بھارتی سرپرستی اچ کم کرݨ آلے دہشت گرداں دا سکول بس اچ معصوم بالاں تے حملہ انہاں دی بلوچستان اچ تعلیم دشمنی دا منہ بولیندا ثبوت اے، دہشت گرداں سکول بس تے حملہ کر تے درندگی دیاں ساریاں حداں پار کر ݙتن، بھارتی سرپرستی اچ پلݨ آلے انہاں دہشت گرداں کوں انجام تئیں پڄا تے ساہ گھنسوں۔ وزیرِ اعظم آکھیا جو بھارتی حمایت یافتہ انہاں دہشت گرداں دے بلوچستان دے امن کوں خراب کرݨ دے ناپاک عزائم کوں مٹی اچ ملاوݨ کیتے کوئی کسر نئیں چھوڑی ویسی۔ وزیرِاعظم پاکستان دے مستقبل، نکیاں اتے معصوم بالاں کوں نشانہ بݨاوݨ آلے دہشت گرداں کوں کیفر کردار تئیں پڄاوݨ عزم کریندیں ہوئیں آکھیا جو میں سودھی پوری قوم دیاں ہمدردیاں دہشت گرداں دی بربریت دا نشانہ بݨݨ آلے معصوم بالاں دے ٹبراں دے نال ہن، سکیورٹی فورسز اتے حکومت پاکستان ملک توں دہشت گردی دے مکمل خاتمے کیتے پر عزم اتے متحد ہن۔