دشمن اساݙی تاریخ نی ڄاݨدا، جݙاں قربانی دا ویلھا آندے تاں پاکستانی ٻالاں دیاں داستاناں وی سنہری اکھراں اچ لکھی ویندن، بھارت دی لُک تے کیتی ڳئی کارروائیاں دا منہ بھن جواب ݙتا ویسی، عطاء اللہ تارڑ

اسلام آباد۔21 مئی (اے پی پی) وفاقی وزیر اطلاعات تے نشریات عطاء اللہ تارڑ  بلوچستان دے ضلع خضدار اچ سکول بس تے دشمن دے بزدلانہ حملے دی شدید مذمت کریندیں ہوئیں آکھیا جو دشمن اساݙی تاریخ نی ڄاݨدا، جݙاں قربانی دا ویلھا آندے تاں پاکستانی ٻالاں دیاں داستاناں وی سنہری اکھراں اچ لکھی ویندن، بھارت دی لُک تے کیتی ڳئی کارروائیاں دا منہ بھن جواب ݙتا ویسی۔ بدھ کوں قومی اسمبلی اجلاس اچ ڳالھ مہاڑ کریندیں ہوئیں وفاقی وزیر اطلاعات آکھیا جو قوم بہادری اتے دلیری نال افواج پاکستان دا ساتھ ݙتے، دشمن کوں شکست فاش ݙیوݨ تے اللہ تعالیٰ دا شکر ادا کریندوں۔ انہاں آکھیا جو اڄ دشمن بلوچستان دے ضلع خضدار اچ سکول بس تے بزدلانہ حملہ کیتا جیندے اچ معصوم ٻالاں کوں نشانہ بݨایا ڳیا۔ انہاں آکھیا جو دشمن اساݙی تاریخ توں ناواقف اے، جݙاں قربانی دا ویلھا آندا اے تاں پاکستانی ٻالاں دیاں داستاناں وی سنہری اکھراں اچ لکھی ویندن۔ عطاء اللہ تارڑ آکھیا جو دشمن اچ اے طاقت اتے جرات نہیں جو او روایتی جنگ اچ پاکستان کوں شکست ݙے سڳے۔ انہاں آکھیا جو فیلڈ مارشل جنرل عاصم منیر دی قیادت اچ افواج پاکستان روایتی جنگ اچ بھارت کوں دھول چٹائی، ہݨ دشمن پراکسیز نال ملک تے حملہ آور اے، خاص کر بلوچستان اتے خیبر پختونخوا اچ فتنہ الخوارج دی فنڈنگ اتے سپورٹ نال دہشت گردی دے واقعات کروائے ویندے پئن۔ انہاں آکھیا جو دشمن روایتی جنگ اچ کوئی کامیابی حاصل نہیں کیتی، انکوں تاریخ دی بدترین شکست تھئی اے۔ وفاقی وزیر آکھیا جو پاکستان دی قوم متحد اے، فتنہ الخوارج کوئی مسئلہ نئی، اساں تاں بھارت دی ایئر بیسز، براہموس اتے رافیلز طیاریاں کوں مار سٹیا۔ انہاں آکھیا جو ایہ ایوان ٻالاں تے حملے دی بھرپور مذمت کریندے، پوری پاکستانی قوم بھارت دی پراکسیز کوں جلدی شکست ݙیسی۔ انہاں آکھیا جو ٹولیاں اچ پھرݨ آلے دہشت گرداں دا خاتمہ کر تے ساہ گھنسوں۔ انہاں آکھیا جو دہشت گرد گروہ ایں غلط فہمی اچ نہ رہوے جو ٻالاں کوں نشانہ بݨا تے او قوم کوں کمزور کر سڳدے۔ وفاقی وزیر آکھیا جو جݙاں تئیں ہک ہک دہشت گرد کوں جہنم واصل نہیں کیتا ویندا، چین نال نہ بہسوں۔ انہاں آکھیا جو اڄ پیش آوݨ آلے واقعے دی تحقیقات جاری ہن اتے ملوث عناصر کوں کیفر کردار تئیں پڄایا ویسی۔ عطاء اللہ تارڑ آکھیا جو کجھ ٻال آئی سی یو اچ زیر علاج ہن، انہاں زخمی ٻالاں دی جلدی صحت یابی کیتے دعا کیتی۔ چھیکڑ اچ انہاں ایں عزم دا اعادہ کیتا جو بھارت دی لُک تے کیتی ڳئی کارروائیاں دا منہ بھن جواب ݙیتا ویسی اتے دہشت گردی دا مکمل خاتمہ کیتا ویسی۔