بلوچستان اتےخیبرپختونخوااچ دہشت گردی دے تانے بانے بھارت نال ملدن،وفاقی وزیر پارلیمانی امور ڈاکٹر طارق فضل چوہدری

اسلام آباد۔21 مئی(اے پی پی)وفاقی وزیر پارلیمانی امور ڈاکٹر طارق فضل چوہدری آکھیے جو خضدار اچ سکول بس تے بزدلانہ حملے اچ 8 ٻال اتے ݙو نینگر شہید تھی ڳئن، جݙاں جو 43 لوک زخمی ہن جنہاں وچوں 10 دی حالت نازک اے۔ انہاں آکھیے جو بھارت ایہو جیھاں بزدلانہ کارروائیاں دی پشت پناہی کریندا پئے۔ قومی اسمبلی دے اجلاس اچ ڳالھ کریندے ڈاکٹر طارق فضل چوہدری زور ݙتے جو بلوچستان اتے خیبرپختونخوا اچ دہشت گردی دے تانے بانے بھارت نال ملدن، اتے اڄ دے خضدار واقعے دے تانے بانے وی بھارت نال رَل ڳئن۔انہاں ݙسایا جو دنیا ݙیکھ ڳھدے جو پاکستان بھارت کوں میدان جنگ اچ شکست ݙتی اے۔ بھارت کوں ہر محاذ تے شرمندگی چاوݨی پئی اتے اوں کوں شکست دا سامݨا کرݨا پئے۔ ہݨ بھارت اڄ اپݨی شکست اتے زخم چٹیندا ہویا ایہو جیھاں بزدلانہ کارروائیاں دی پشت پناہی کریندا پئے۔ انہاں بھارتی قومی سلامتی دے مشیر دے اڄوکے پاک بھارت تناؤ دے دوران دے بیان دا حوالہ ݙتا جیندے اچ انہاں واضح طور تے آکھیا ہئی جو پاکستان اچ بھارت دیاں پراکسیز موجود ہن، اتے انہاں آکھیا ہا جو جے اساں پاکستان تے حملہ کریسوں تاں بی ایل اے پاکستان دے اندروں حملہ کریسی۔ڈاکٹر طارق فضل چوہدری آکھیے جو حکومت دہشت گردی کوں  منڈھوں مکاوݨ کیتے پرعزم اے۔ انہاں فیلڈ مارشل عاصم منیر دی قیادت اچ افواج پاکستان دی بہادری، ذہانت، عزم، حوصلے اتے دانشمندی دی تعریف کیتی اتے آکھیے جو اڄوکی جنگ اچ اساکوں واضح کامیابی ملی اے۔ ایں طرح ائیر چیف دی قیادت اچ ساݙی فضائیہ مہارت دا ثبوت ݙتے اتے فضائی جنگاں دی تاریخ اچ نویں تاریخ رقم کر ݙتی اے۔ انہاں زور ݙتے جو افواج پاکستان واضح طور تے دہشت گردی مکاوݨ دا عزم کررکھیئے، پاکستان دی سالمیت اتے سلامتی دے خلاف عناصر کوں نہ چھوڑیا ویسی۔