پاکستان چین نال اپݨے تاریخی تعلقات کوں قدرنال ݙیکھدے، صدر مملکت

اسلام آباد۔21 مئی(اے پی پی) صدر مملکت آصف علی زرداری چین نال سفارتی تعلقات دے قیام دی 74 ویں سالگرہ تے پاکستان اتے چین دے عوام کوں مبارخ باد ݙیندے ہوئیں آکھیے جو پاکستان چین نال اپݨے تاریخی تعلقات کوں قدر دی نگاہ نال ݙیکھدے، چین نال تعلقات پاکستان دی خارجہ پالیسی دا اہم جزو ہن۔ ایوان صدر دے پریس ونگ موجب  صدر مملکت آکھیے جو پاکستان “ون چائنا” پالیسی دے اصولی موقف دا مضبوط حامی اے، گزریل 7 ݙھاکیں توں ݙوہیں ملکاں وچال تعلقات تکڑے توں ٻئے تکڑے تھی ڳئن ۔انہاں آکھیے جو پاکستان اتے چین پکے یار تے تزویراتی تعاون شراکت داری اچ ڳنڈھئے پئن، پاکستان اتے چین وچال سدا بہار دوستی اے، ہر اوکھے ویلھے اچ پاکستان دا ساتھ ݙیوݨ تے چینی حکومت اتے عوام دے مشکور ہیسے۔ صدر مملکت آکھیے جو پاکستان دی معاشی و سماجی ترقی اچ چین دا اہم کردار اے، پاک-چین تعلقات سانجھے اعتماد، احترام اتے خیر سگالی دے جذبات تے مبنی ہن۔ صدر آصف علی زرداری آکھیے ݙوہیں بھرا ملکاں مشترکہ خوشحالی، امن و استحکام اتے خطے اچ رابطے ودھاوݨ چاہندن ݙوہیں ملک خطے اتے دنیا کں درپیش چیلنجز نال نبڑݨ کیتے رَل تے کم کریندے رہسن۔ انہاں آکھیے جو چین پاکستان دے دفاعی شعبے کوں تکڑا کرݨ اچ اہم کردار ادا کیتے، پاک-چین اقتصادی راہداری (CPEC) ݙوہیں ملکاں وچال تعلقات دی درخشاں مثال اے، سی پیک پاکستان دی معیشت، بنیادی ڈھانچے اتے توانائی دے شعبے تے مثبت اثرات چھوڑئن۔ صدر مملکت آکھیء جو پاکستان چین نال معیشت، ٹیکنالوجی، دفاع، تعلیم اتے تجارت دے شعبیں اچ ݙو طرفہ تعلقات کوں مزید ودھاوݨ چاہندے ۔ صدر مملکت مستقبل اچ چین نال تعلقات مزید وسیع کرݨ دا عزم کریندے پاک-چین سفارتی تعلقات دی 74 ویں سالگرہ دے موقع تے چینی قیادت اتے عوام کیتے نیک خواہشات دا اظہار کیتے۔