اسلام آباد۔ 7 جولائی (اے پی پی) وفاقی وزیر داخلہ محسن نقوی گلگت بلتستان دے عظیم سپوت حوالدار لالک جان (نشان حیدر) دے یوم شہادت تے انہاں کوں سلام عقیدت پیش کریندیں ہوئیں آکھیا جو نشانِ حیدر دا اِے عظیم وارث پاکستان دے عسکری وقار، قومی خود مختاری اَتے استحکام دی تابندہ علامت اے۔ سنوار کوں جاری بیان اچ وزیر داخلہ آکھیا جو حوالدار لالک جان شہید بے مثال جرأت نال دفاع وطن دا روشن باب رقم کیتا، انہاں دی داستان شجاعت رہندی دنیا تئیں قوم دا فخر اَتے تاریخ دا اثاثہ رہسی۔ وزیر داخلہ آکھیا جو دشمن دے سامݨے سِینہ سپر رہݨ آلا اے سپاہی مادرِ وطن دی سرحداں دا ناقابل فراموش نگہبان بݨ تے ہمیشہ کیتے امر تھی ڳیا، اڳلے مورچیاں تے ونڄ تے دشمن دے سامھے ݙٹّ ونجݨ آلے ایں جوان بہادری اَتے حب الوطنی دی اعلیٰ ترین مثال قائم کیتی۔ محسن نقوی آکھیا جو دشمن دی شدید گولہ باری اچ زخمی تھیوݨ دے باوجود مورچہ نہ چھوڑݨ آلے ایں بُلند حوصلہ سپاہی ثابت قدمی دی ایجھی مثال قائم کیتی جو تاریخ دے سِینے تے ہمیشہ نقش رہسی، دشمن دی یلغار دا مردانہ وار مقابلہ کرݨ آلا لالک جان اڄ وی قوم دے دلاں وچ زندہ اے۔ محسن نقوی آکھیا جو لالک جان شہید قوم دا ہیرو دے اَتے ہمیشہ اساݙے دلاں وچ زندہ رہسی، قوم دا سلام اے ایں جوانمرد کوں جئیں شجاعت دی آخری حد چھو تے جام شہادت نوش کیتا۔
