فساد یا 9 مئی ڄھئیں صورتحال پیدا کرݨ دیاں کوششاں نال فیصلہ کن طاقت نال نمٹیا ویسسی: کور کمانڈرز کانفرنس

راولپنڈی۔2 اکتوبر(اے پی پی)کور کمانڈرز کانفرنس واضح کیتے جو کہیں وی بہانے نال انتشار کھنݙاوݨ یا 9 مئی ڄھئیں صورتحال پیدا کرݨ دیاں کوششان نال سختی اتے قانون دی پوری طاقت نال نمٹیا ویسی، افغانستان توں ڄمی بھارتی سرپرستی اچ تھیوݨ والی دہشتگردی دے خلاف پاکستان دے حقِ دفاع دی توثیق، پاکستان، سعودی عرب اتے ترکیہ دے تاریخی “مکہ مشترکہ دفاعی معاہدے” دا خیرمقدم اتے حرمین شریفین دے تحفظ دا غیر متزلزل عزم دوہرایا ڳیا۔ آئی ایس پی آر دے مطابق آرمی چیف و چیف آف ڈیفنس فورسز فیلڈ مارشل سید عاصم منیر دی زیرِ صدارت جنرل ہیڈکوارٹرز (جی ایچ کیو) راولپنڈی اچ 277 ویں کور کمانڈرز کانفرنس تھئی۔ فورم مسلح افواج، قانون نافذ کرݨ والے اداریاں دے شہداء اتے مادرِ وطن کیتے اپݨیاں جاناں وارݨ والے سول سوسائٹی دے ارکان کیتے فاتحہ خوانی کیتی اتے انہاں دیاں لازوال قربانیاں کوں زبردست خراجِ عقیدت پیش کیتا۔ فورم موجودہ سیکیورٹی صورتحال دا جائزہ گھدا اتے اعلیٰ درجے دی آپریشنل تیاری برقرار رکھݨ دا اعادہ کیتا۔ فورم پاکستان دے حقِ دفاع اتے افغانستان توں جنم گھنݨ والی دہشت گردی دے خلاف ٹارگٹڈ کارروائی دے حق دی توثیق کیتی اتے زور ݙتے جو بھارت دی تݙ تے دہشت گردی دی سہولت کاری کرݨ والی طالبان دی گمراہ کن قیادت ہی ایںدے نتائج دی مکمل ذمہ دار اے۔ فورم قانون نافذ کرݨ والے اداریاں ولوں دہشتگردی دے خلاف مسلسل اتے کامیاب انٹیلی جنس بیسڈ آپریشنز کوں سراہندے زور ݙتے جو انہاں عسکری کوششاں کوں غیر عسکری اقدامات نال مربوط کیتا ونڄے جیندے نچلی سطح تے عوام دوست طرزِ حکمرانی، عوام نال تزویراتی روابط، مفاد پرست عناصر دی سرپرستی اچ چلݨ والے دہشت گردی اتے جرائم دے گٹھ جوڑ دا خاتمہ اتے نیشنل ایکشن پلان و وژن “عزمِ استحکام” دے مطابق پولیس دیاں صلاحیتیاں اچ اضافہ شامل ہین۔ فورم داخلی استحکام دی اہمیت کوں اڳونہا کیتا اتے عزم دوہرایا جو کہیں وی بہانے نال انتشار کھنݙاوݨ یا 9 مئی ڄھئیں صورتحال پیدا کرݨ دیاں کوششان نال سختی اتے قانون دی پوری طاقت نال نمٹیا ویسی۔ فورم پاکستان، سعودی عرب تے ترکیہ دے “مکہ مشترکہ دفاعی معاہدے” دا خیرمقدم کیتا اتے دیرینہ تزویراتی و اجتماعی دفاعی تعلقات اچ ایںدے کردار کوں سراہیا۔ فورم سعودی عرب دے خلاف حوثیاں دے حملیاں دی مذمت کریندے ٻھرا مملکت نال یکجہتی کیتی اتے حرمین شریفین دے تحفظ اتے تقدس کیتے پاکستان دے غیر متزلزل عزم کوں دوہرایا۔ فورم غیر قانونی طور تے بھارت دے زیرِ قبضہ جموں و کشمیر اتے پاکستان دے اصولی موقف کوں وی دہرایا اتے اقوامِ متحدہ دی سلامتی کونسل دیاں متعلقہ قرارداداں تے کشمیری عوام دیاں امنگاں دے مطابق تنازعہ کشمیر دے حل دی حمایت دی توثیق کیتی۔ فیلڈ مارشل فارمیشنز دیاں آپریشنل تیاریاں تے پیشہ ورانہ مہارت دی تعریف کیتی۔ انہاں کمانڈرز کوں ہدایت کیتی جو او انٹیلی جنس بیسڈ آپریشنز کوں ٻیا مستحکم کرن اتے جدید ٹیکنالوجی، تربیت اتے ملٹی ڈومین انضمام نال جنگی صلاحیتیاں کوں ودھاون۔ انہاں آکھیا جو مسلح افواج قوم دی غیر متزلزل حمایت نال پاکستان دی خودمختاری، علاقائی سالمیت اتے قومی سلامتی دے تحفظ کیتے مکمل طور تے ہر ویلھے تیار ہین۔