حکومت اتے اپوزیشن دے مذاکرات دا پہلا دور مکمل، چھݨ چھݨ کوں ول ڳالھ مہاڑ تھیسی: ترجمان قومی اسمبلی سیکرٹریٹ

اسلام آباد۔2 اکتوبر (اے پی پی)حکومت اتے اپوزیشن دے مذاکرات اسلام آباد اچ جاری ہین اتے ایں ڳالھ مہاڑ دا پہلا دور مکمل تھی ڳئے اتے مذاکرات کوں نتیجہ خیز ٻݨاوݨ کیتے صبحائین چھݨ چھݨ کوں ولا فریقین ڳالھ مہاڑ کریسن۔ قومی اسمبلی سیکرٹریٹ دے ترجمان ݙسائے جو سپیکر قومی اسمبلی سردار ایاز صادق حکومت اتے اپوزیشن اراکین دے اجلاس دی آڳواݨی کیتی۔ حکومتی وفد، پاکستان پیپلز پارٹی اتے اپوزیشن اراکین ملک دی سیاسی صورتحال تے الایا۔ حکومت، پیپلز پارٹی اتے اپوزیشن اپݨا اپݨا موقف ݙسایا۔ فریقین مختلف معاملات تے ہک ٻئے کوں تحمل نال سݨیے اتے ڳالھ مہاڑ کیتی۔ مذاکرات دا ݙوجھا دور کل (چھݨ چھݨ کو) 2 وجے ولا سپیکر چیمبر اچ تھیسی۔ حکومت اتے پی پی پی اپوزیشن نال قومی مسائل کوں مذاکرات نال حل کرݨ تے زور ݙتے۔ ترجمان آکھیا جو سپیکر قومی اسمبلی سردار ایاز صادق حکومت، پاکستان پیپلز پارٹی اتے اپوزیشن دے مذاکرات کرواوݨ اچ اہم کردار ادا کیتے۔ اجلاس اچ وفاقی وزراء امیر مقام، رانا ثناء اللہ، محسن نقوی، طارق فضل چوہدری اتے وزیرِ مملکت طلال چوہدری، سینیٹر شیری رحمان، اراکینِ قومی اسمبلی نوید قمر اتے اعجاز حسین جاکھرانی ڄݙاں جو اپوزیشن رہنما بیرسٹر گوہر خان، راجہ ناصر عباس، ملک عامر ڈوگر اتے سابق سپیکر اسد قیصر دے علاوہ سلمان اکرم راجہ وی اجلاس اچ شریک تھئے۔