اسلام آباد۔ 7 جولائی(اے پی پی)وزیراعظم محمد شہباز شریف کوں ایف بی آر اَتے انٹیلی جنس بیورو دی ٹیکس چوری اَتے ذخیرہ اندوزی دے خلاف آپریشنز تے رپورٹ پیش کر ݙتی ڳئی جیندے اچ ݙسایا ڳعے جو مشترکہ کوششاں نال 178 ارب روپے دی ریکوری ممکن تھئی اے جݙاں جو وزیراعظم محمد شہباز شریف ایف بی آر اَتے انٹیلی جنس بیورو دے ٹیکس وصولیاں اچ ودھارے کیتے اقدامات دی پذیرائی کیتی اے۔ وزیراعظم آکھیا جو ملکی ٹیکس آمدن اچ ودھارے کیتے سارے اداریاں کوں رل تے کم کرݨا ہوسی، پاکستان دا معاشی استحکام ٹیم دی مشترکہ کوششاں نال ممکن تھئے، ملک دی معاشی ترقی اَتے عوام دی خوشحالی کیتے وی رل تے کم کرکرݨے۔ وزیراعظم کوں ایف بی آر اَتے انٹیلی جنس بیورو دی ٹیکس چوری اَتے ذخیرہ اندوزی دے خلاف آپریشنز تے رپورٹ پیش کیتی ڳئی جو انٹیلی جنس بیورو اَتے ایف بی آر دی مشترکہ کوششاں نال 178 ارب روپے دی ریکوری ممکن تھئی۔ انہاں اقدامات نال کمپنیاں دے انضمام اَتے ٹیلی کمیونیکیشن شعبے اچ بقایا جات دی مد اچ ٹیکس آمدن اچ 69 ارب روپے دا ودھارا تھئے۔ انٹیلی جنس بیورو چینی، جانوراں دی خوراک، مشروبات، کھاوݨ والے تیل، تمباکو اَتے سیمنٹ دے شعبے اچ 515 چھاپے مارین، انہاں کارروائیاں اچ ٹیکس چوری دیاں کوششاں کوں ناکام بݨیدے ہوئیں 10.5 ارب روپے دا اضافی ٹیکس وصول کیتا ڳیا۔ انٹیلی جنس بیورو ذخیرہ اندوزی اَتے شئیں دیاں قیمتاں اچ مصنوعی ودھارے دیاں کوششاں ناکام بݨاوݨ کیتے چینی، کھاد اَتے کݨک دے شعبیاں اچ 13 ہزار توں ودھ آپریشن کیتے اَتے اپریل 2022ء توں ہݨ تئیں 99 ارب روپے توں ودھ دی غیر قانونی طور تے ذخیرہ شدہ شئیں قبضے اچ ڳِھدیاں ڳن۔
