اسلام آباد۔ 9 جولائی (اے پی پی) وفاقی وزیر صحت مصطفیٰ کمال آکھیا جو ماہرین آہدن جو احتیاط علاج توں بہتر اے، ہیلتھ کیئر دی پہلی سیڑھی لوکاں کوں بیماری توں بچاوݨ اے۔ اے ڳالھیں انہاں انڈس ہسپتال اینڈ ہیلتھ نیٹ ورک دے تعاون نال فضلہ ٹکاݨے لاوݨ کیتے ییلو وین ڈیوݨ دی تقریب نال خطاب کریندیں ہوئیں کیتا۔ انہاں آکھیا جو احتیاط علاج توں بہتر اے، اگر احتیاط نہ کریسوں تاں بیماریاں گھیر گھنسن، پاکستان دے 15 ضلعیاں دے ہسپتالاں دا فضلہ ٹکاݨے لاوݨ کیتے ماڈل پراجیکٹ ݙِتے۔ انہاں آکھیا جو انڈس ہسپتال گلوبل فنڈ دے تعاون نال پندرہ ضلعیاں اچ ہسپتالاں دا فضلہ ٹکاݨے لاوݨ کیتے گاݙیاں ݙیتن۔ وفاقی دارالحکومت اچ ہک وین ڈی ایچ او اسلام آباد دے حوالے کیتی ویسی۔ انہاں آکھیا جو ہسپتال ویسٹ خطرناک اے، اِیہ فضلہ جتھوں لنگھدے اتھاں بیماری پھیلیندے، لوکاں کوں بیماریاں توں بچاوݨ کیتے ہک وݙا قدم اے، ہسپتال بݨاوݨ اَتے دوائیں دی فراہمی تے توجہ مرکوز اے، بیماری توں بچاؤ تے کم نئیں تھیا، 68 فیصد بیماریاں آلودہ پاݨی پیوݨ نال ہن۔ وزیر صحت مصطفیٰ کمال آکھیا جو پیوݨ دا پاݨی صاف ہووے تاں 68 فیصد بیماریاں گھٹ تھی ونڄن، صاف پاݨی دی فراہمی، آبادی تے کنٹرول اَتے ہسپتالاں دا زہریلا فضلہ ٹکاݨے لاوݨ نال بیماریاں ڳھٹ تھیسن۔ انہاں آکھیا جو انڈس ہسپتال دے تعاون نال انساناں کوں بیماری توں بچاوݨ دا قدم چاتا ڳیا، اساکوں لوکاں کوں بیمار تھیوݨ توں بچاوݨا اے، اِے اساݙی ترجیح اے، ہیلتھ کیئر سسٹم کوں مضبوط بݨاوݨ اساݙی ترجیح اے، آبادی سب توں وݙا مسئلہ اے، ایں پاروں مسائل جنم گھِندے پئن۔ انہاں آکھیا جو ہسپتالاں اچ مریضاں دا بوجھ ہر ݙینھ ودھدا پئے، آبادی گھٹ ہوسی تاں صحت دے مسئلیاں تے قابو پاوݨ ممکن ہوسی۔
