قومی زبان اچ ٹیکس گوشوارے خوش آئند، انہاں کوں بھرݨ اچ مدد کیتے ہیلپ لائن ٻݨاوݨ، ڈیجیٹل انوائسنگ دا وی اردو اچ اجرا کیتا ونڄے، وزیراعظم محمد شہباز شریف

اسلام آباد۔ 14 جولائی (اے پی پی) وزیراعظم محمد شہباز شریف سوکھے اَتے قومی زبان اردو اچ ٹیکس گوشوارے کوں خوش آئند قرار ݙیندیں ہوئیں ہدایت کیتی اے جو انہاں کوں بھرݨ دے عمل اچ مدد کیتے ہیلپ لائن ٻݨائی ونڄے، ڈیجیٹل انوائسنگ دا وی اردو اچ اجرا کیتا ونڄے اَتے ٹیکس اصلاحات اچ عام بندے دی سہولت تے توجہ ݙتی ونڄے۔ پی ایم آفس دے میڈیا ونگ توں جاری بیان موجب سنوار کوں وزیراعظم محمد شہباز شریف دی سربراہی اچ ایف بی آر دی ڈیجیٹائزیشن، مصنوعی ذہانت (اے آئی) تے مبنی نظام دے اطلاق اَتے ݙوجھیاں اصلاحات تے ہفتہ وار جائزہ اجلاس تھیا۔ وزیراعظم ہدایت کیتی جو ایف بی آر دی ساری اصلاحات دی شفافیت کیتے تھرڈ پارٹی ویلیڈیشن یقینی بݨائی ونڄے، عوام دی سہولت کیتے ٹیکس گوشواریاں کوں ڈیجیٹل، مختصر اَتے مرکزی ڈیٹا بیس نال جوڑ تے سوکھا بݨا ݙتا ڳئے۔ انہاں آکھیا جو نویں سوکھے ٹیکس گوشواریاں نال تنخواہ دار طبقہ سب توں ودھ مستفید تھیسی۔ وزیراعظم ہدایت کیتی جو ٹیکس گوشواریاں (ریٹرنز) دی آسانی دے نال عوامی آگاہی مہم چلائی ونڄے تاں جو ودھ توں ودھ لوک نویں نظام دے تحت گوشوارے جمع کروا سڳن۔ انہاں آکھیا جو ٹیکس نظام دی اصلاحات دے مثبت ثمرات وزیر خزانہ، معاشی ٹیم، چیئرمین ایف بی آر اَتے انہاں دی ٹیم دی انتھک محنت دا نتیجہ ہن، حکومت دی پہلی ترجیحات اچ ٹیکس بیس دا وادھا اَتے غریب بندے تے ٹیکس دے بوجھ ڳھٹ کرݨ شامل اے۔وزیراعظم آکھیا جو ملکی تاریخ اچ پہلی واری مصنوعی ذہانت دے ذریعے ٹیکس اسیسمنٹ دے نظام دا اطلاق وݙی کامیابی اے، ایف بی آر دے اقدامات قابل ستائش ہن۔ انہاں ہدایت کیتی جو ڈیجیٹل انوائسنگ دے نظام وچ شمولیت کیتے چھوٹے اَتے درمیانے درجے دے کاروبار کوں خصوصی سہولت فراہم کیتی ونڄے۔ اجلاس اچ وفاقی وزراء احد خان چیمہ، عطاء اللہ تارڑ، علی پرویز ملک، وزیر مملکت برائے خزانہ بلال اظہر کیانی، چیف کوآرڈی نیٹر مشرف زیدی، چیئرمین ایف بی آر اَتے متعلقہ اعلیٰ حکام شرکت کیتی۔اجلاس کوں ڈیجیٹل انوائسنگ، ای بِلٹی، ٹیکس گوشواریاں کوں سوکھا بݨاوݨ، مصنوعی ذہانت تے مبنی اسیسمنٹ سسٹم، سینٹرل کمانڈ اَتے کنٹرول سینٹر دے قیام اَتے کارگو ٹریکنگ سسٹم تے پیش رفت، ایف بی آر دے کمانڈ اَتے کنٹرول یونٹ دے قیام دی پیش رفت بارے ݙسیا ڳئیا۔ اجلاس کوں ݙسایا ڳیا جو ایں کیتے بݙنگ جلدی مکمل کر تے ستمبر تئیں ایں کوں مکمل طور تے فعال کر ݙتا ویسی، ایں نال نہ صرف مرکزی ڈیٹا میسر ہوسی بلکہ فیصلہ سازی اچ وی آسانی ہوسی، اجلاس کوں مصنوعی ذہانت تے مبنی اسیسمنٹ نظام تے وی بریفنگ ݙتی ڳئی۔اجلاس کوں ݙسایا ڳیا جو بحری جہازاں دی آمد توں پہلے تاجراں کوں پہلے توں گُڈز ڈیکلریشن بھرݨ دی سہولت فراہم کیتی ڳئی اے جئیں دے تحت اپ فرنٹ ڈیوٹیز اَتے ٹیکسز تے مکمل چھُوٹ ݙتی ویسی، ایں نظام دے اطلاق نال پہلے توں گُڈز ڈیکلریشن 3 فیصد توں ودھ تے 95 فیصد توں ودھ تھیوݨ دی توقع اے، ایں طرحاں ایڈوانس گُڈز ڈیکلریشن آلے کنٹینراں کوں بحری جہاز توں سدھا فیکٹری پُڄݨ دی سہولت ہوسی۔اجلاس کوں ݙسایا ڳیا جو ڈیجیٹل انوائسنگ دے ذریعے سارے چھوٹے اَتے وݙے کاروبار خرید و فروخت دے ویلھے ایف بی آر دے آن لائن نظام نال رسید دا اجرا یقینی بݨیسن، ایں نظام دے تحت آندے کجھ مہینیاں اچ 20 ہزار دے نیڑے کاروبار نظام نال منسلک تھی ویسن۔ صرف ہک مہینے اچ ایں نظام دے تحت 11.6 ارب روپے دی اَٹھ ہزار انوائسز دا اجرا تھیا، ایں نظام اچ ٹیکس دہندگان دا پورٹل اَتے ایں دی نگرانی دا ڈیش بورڈ شامل اے۔اجلاس کوں ݙسایا ڳیا جو پرال (PRAL) دے تحت نظام نال منسلک تھیوݨ دی سہولت بغیر کہیں لاگت دے مفت ݙتی ویندی پئی اے، تاجراں دی ایں نظام دے حوالے نال تربیت یقینی بݨائی ویندی پئی اے، ایں نظام دے مکمل اطلاق دے بعد تاجراں کوں سیلز ٹیکس گوشوارے جمع کرواوݨ دی لوڑھ وی نہ رہسی کیوں جو ہر خرید و فروخت خودکار طریقے نال نظام اچ ریکارڈ تھیندی رہسی، ایں دے علاوہ بین الاقوامی سطح تے رائج نظام نال ہم آہنگ 8 ہندساں تے مبنی مخصوص ایچ ایس کوڈ فیک اَتے فلائنگ انوائسنگ دا خاتمہ کریسی اَتے ڈیجیٹل انوائسنگ دے ذریعے سیلز ٹیکس نظام دی کارکردگی کوں پرکھݨ ٻیا سوکھا تھیسی۔ اجلاس کوں ݙسایا ڳیا جو نظام کوں مؤثر بݨاوݨ کیتے کاروباری بندیاں دے تربیتی سیشن وی کیتے ڳئن۔ حالی اچ وزیراعظم دے دورہ آذربائیجان اچ ترکیہ دے صدر نال گالھ مہاڑ دے بعد ترک وفد پاکستان پڄ ڳئے اَتے ایں نظام دی پاکستان اچ جلدی تشکیل تے اجرا کیتے وفد دے نال مشاورت جاری اے۔