عراق اَتے ایران ونڄݨ آلے زائرین اساں کیتے ٻہوں اہم ہن، سہ ملکی کانفرنس نال زائرین کوں مزید سہولت مِلسی، کانفرنس کراوݨ تے ایرانی وزیر داخلہ دے شکر گزار اوں، وزیر داخلہ محسن نقوی دا خطاب

تہران۔ 14 جولائی (اے پی پی) وفاقی وزیر داخلہ محسن نقوی آکھیے جو عراق اَتے ایران ونڄݨ آلے زائرین اساں کیتے ٻہوں اہم ہن، سہ ملکی کانفرنس نال زائرین کوں مزید سہولت مِلسی، پاکستان دی درخواست تے سہ ملکی کانفرنس دے انعقاد تے ایرانی وزیر داخلہ سکندر مومنی دے شکر گزار ہیسے، وزیراعظم پاکستان اَتے ݙوجھے اعلیٰ حکام جنگ اچ ایران کیتے انتہائی متحرک و مثبت کردار ادا کیتا۔اے ڳالھ انہاں پاکستان دی درخواست تے زائرین دے مسئلیں دے حل کیتے سݙائی ڳئی سہ ملکی کانفرنس نال خطاب کریندے آکھی۔ وزیر داخلہ آکھیا جو جنگ اچ شاندار فتح تے ایران اَتے ایرانی وزیر داخلہ کوں مبارخ ݙینداں۔ وزیر داخلہ آکھیا جو پاکستان ایران تے حملے دی کُھل تے مذمت کیتی اَتے ایران دے حق دفاع کوں مکمل طور تے سپورٹ کیتا۔ محسن نقوی آکھیا جو جنگ دے دوران پاکستانی عوام ایرانی عوام دے نال کھڑے رہین، پاکستان اَتے ایران بھرا ہن اَتے ہمیشہ بھرا رہسن۔ وفاقی وزیر داخلہ آکھیا جو وزیراعظم پاکستان اَتے ݙوجھے اعلیٰ حکام جنگ اچ متحرک و مثبت کردار ادا کیتا۔ انہاں آکھیا جو پاکستان او بہترین کردار ایران کیتے ادا کیتا۔ انہاں آکھیا جو پاکستان اچ ایران دے سفیر امیری مقدم اتھاں موجود ہن اَتے اے ایں ڳالھ دے گواہ ہن۔ محسن نقوی آکھیا جو سارے جاݨدن ہن جو اربعین تے لکھاں زائرین عراق ویندن، عراقی وزیر داخلہ اَتے وزارت داخلہ جیویں لکھاں زائرین دی ݙیکھ بھال کریندن او قابل تحسین اے۔ محسن نقوی آکھیا جو زائرین کوں بہترین طریقے نال ہینڈل کرݨ تے عراقی وزارت داخلہ کوں سلام پیش کریندن۔ وزیر داخلہ آکھیا جو زائرین دے حوالے نال عراق و ایران دے وزرائے داخلہ کوں پاکستان دی طرفوں ہر ممکن یقین ݙویندن۔ محسن نقوی آکھیا جو یکم جنوری 2026 دے بعد پاکستانی زائرین انفرادی طور تے عراق نہ ونڄ سڳسن، زائرین گروپ آرگنائزرز دے تحت ہی عراق وںڄ سڳسن۔ محسن نقوی آکھیا جو زائرین گروپ آرگنائزرز دی رجسٹریشن دا عمل شروع کر ݙتا ڳئے ، آرگنائزرز گروپ عراق ونڄݨ آلے زائرین دی وطن واپسی دے ذمہ وار ہوسن۔ محسن نقوی آکھیا جو صرف او لوک انفرادی طور تے عراق ونڄ سڳسن جنہاں کوں سفارت خانہ خصوصی ویزا جاری کریسی، گروپ آرگنائزرز دے سسٹم نال غیر قانونی عراق ونڄݨ آلیں اَتے زائد قیام دے رجحان دا خاتمہ تھیسی ۔ وفاقی وزیر داخلہ آکھیا جو عراق اَتے ایران وی پاکستان دے ایں نویں نظام دے نال ہن، اساں مشترکہ اقدامات نال رل تے غیر قانونی طور تے عراق ونڄݨ آلیں اَتے اتھاں زائد قیام کرݨ آلیں کوں ہر صورت روکݨا اے۔ محسن نقوی آکھیے جو پاکستان دے زائرین دی ݙیکھ بھال تے عراق اَتے ایران دیاں حکومتاں دا شکریہ ادا کرینداں۔ محسن نقوی آکھیا جو لکھاں زائرین دا خیال رکھݨا ٻہوں وݙا چیلنج اے اَتے ݙونہاں وزرائے داخلہ اے ذمے واری خوش اسلوبی نال ادا کریندے پئن۔ انہاں آکھیا جو ایران دے سپریم لیڈر آیت اللہ خامنہ ای جنگ دے دوران مضبوطی نال کھڑے رہین اَتے جرأت دے نال قیادت کیتی، آیت اللہ خامنہ ای اَتے ایرانی عوام کوں عظیم فتح تے مبارخ ݙیندوں ۔وفاقی وزیر داخلہ آکھیا جو ایران دے نائب وزیر داخلہ علی اکبر پور جمشیدیان، ایرانی وزیر داخلہ دے سینئر مشیر نادر یار احمدی، پاکستان اچ ایران دے سفیر امیری مقدم، ایران اچ پاکستان دے سفیر محمد مدثر ٹیپو، پاکستانی وزارت داخلہ دے سیکرٹری خرم آغا، عراق دی وزارت داخلہ دے اعلیٰ حکام وی سہ ملکی کانفرنس اچ شرکت کیتی۔ ایران دے دارالحکومت تہران اچ پاکستان، ایران اَتے عراق دے وزرائے داخلہ دی سہ ملکی کانفرنس اچ ایران اَتے عراق ونڄݨ آلے زائرین دی سہولت کیتے ہر ممکن اقدام تے اتفاق کیتا ڳئے۔ کانفرنس اچ فیصلہ کیتا ڳئے جو زائرین دی سہولت کیتے پاکستان، ایران اَتے عراق دا سانجھا ورکنگ گروپ تشکیل ݙتا ویسی۔