پاکستان، ایران اَتے عراق دے وزرائے داخلہ دا زائرین دے سوکھ کیتے مشترکہ ورکنگ گروپ ٻݨاوݨ تے اتفاق

تہران۔14 جولائی(اے پی پی) ایران دے دارالحکومت تہران اچ پاکستان، ایران اَتے عراق دے وزرائے داخلہ دی سہ ملکی کانفرنس اچ زائرین دی سہولت کیتے تریے ملکاں وچال مشترکہ ورکنگ گروپ ٻݨاوݨ تے اتفاق کیتا ڳئے۔ سہ ملکی کانفرنس دے بعد تریے ملکاں دے وزرائے داخلہ تہران اچ مشترکہ پریس کانفرنس کیتی اتے سہ ملکی کانفرنس دے فیصلیاں دا ݙسایا۔ اے کانفرنس پاکستان دی درخواست تے کرائی ڳئی ہئی۔ ایرانی وزیر داخلہ سکندر مومنی کانفرنس اچ شرکت تے شرکا دا شکریہ ادا کیتا اتے ݙسایا جو زائرین دے مسئلے حل کرݨ کیتے مشترکہ حکمت عملی ٻݨائی ڳئی اے جو ایں سانڳے جوائنٹ ورکنگ گروپ ٻݨایا ویسی۔ عراقی وزیر داخلہ عبدالامیر الشمری آکھیے جو زائرین بارے تریے ملکاں اتفاق رائے نال مشترکہ حکمت عملی اپناوݨ دا آکھیے، امید اے جو اے مسئلہ رل تے حل کر ڳھدا ویسی۔ وفاقی وزیر داخلہ محسن نقوی آکھیے جو سہ ملکی کانفرنس اچ ٻہوں سارے امور تے ڳالھ تھئی اے جیندے نال 70 لکھ توں ودھ زائرین دے مسلیاں دے حل اچ مدد ملسی۔ انہاں آکھیا جو عراق دی حکومت دے مشکور ہیں جیڑھے اربعین امام حسینؓ تے وݙے اجتماع دی میزبانی کریندی اے، اتے ایرانی حکومت وی ایں سانڳے خصوصی ڈیسک ٻݨائن، زائرین دے سوکھ کیتے اقدامات کیتے ویسن اتے مشترکہ حکمت عملی نال زائرین کوں ودھ سوکھ ݙتا ویسی۔ ایں توں پہلے سہ ملکی کانفرنس نال خطاب اچ وزیر داخلہ محسن نقوی پاکستان دی درخواست تے زائرین دے مسائل دے حل کیتے سہ ملکی کانفرنس کراوݨ تے شکریہ ادا کریندے آکھیا جو عراق اَتے ایران ون٘ڄݨ آلے زائرین اساݙے کیتے ٻہوں اہم ہن اَتے سہ ملکی کانفرنس نال عراق و ایران ون٘ڄݨ آلے زائرین کوں مزید سہولت مِلسی۔ محسن نقوی جنگ اچ شاندار فتح تے ایران اَتے ایرانی وزیر داخلہ کوں مبارکباد ݙیندے ہوئیں آکھیا جو پاکستان ایران تے حملے دی کُھل تے مذمت کیتی اَتے ایران دے حق دفاع کوں مکمل طور تے سپورٹ کیتے، پاکستان اتے ایران ہمیشہ ہک ٻئے دے نال کھڑے رہسن۔ انہاں ایران اتے عراق ونڄݨ آلے زائرین دی بہترین ݙیکھ ٻھال اتے سوکھ کیتے اقدامات تے ایرانی اتے عراقی حکومت دی تعریف کریندے ایں سانڳے پاکستان ولوں مکمل حمایت دا یقین ݙیوایا۔ انہاں واضح کیتا جو یکم جنوری 2026 دے بعد پاکستانی زائرین انفرادی طور تے عراق نا ون٘ڄ سڳسن، زائرین گروپ آرگنائزرز دے تحت ہی عراق ونڄ سڳسن، زائرین گروپ آرگنائزرز دی رجسٹریشن شروع کر ݙتے، آرگنائزرز گروپ ہی عراق ون٘ڄݨ آلے زائرین دی وطن واپسی دے ذمہ وار ہوسن، صرف اوہے زائرین ہی انفرادی طور تے عراق ون٘ڄ سڳسن ڄیکوں سفارت خانہ خصوصی ویزا جاری کریسی، گروپ آرگنائزرز دے سسٹم نال غیر قانونی عراق ون٘ڄݨ آلیاں اَتے زائد قیام دے رجحان دا خاتمہ تھیسی، اساں مشترکہ اقدامات نال رل تے غیر قانونی طور تے عراق ون٘ڄݨ آلیاں اَتے اتھاں زائد قیام کرݨ آلیاں کوں ہر صورت روکݨے۔ انہاں آکھیا جو لکھاں زائرین دا خیال رکھݨ ٻہوں وݙا چیلنج اے اَتے ݙوہاں ایران اتے عراق وزرائے داخلہ اے ذمے واری خوش اسلوبی نال ادا کریندے پئے ہن۔