وفاقی وزیر داخلہ محسن نقوی دی ایران دے صدر مسعود پزشکیان نال ملاقات، سانجھی دلچسپی دے معاملیاں تے پاک-ایران تعلقات تے ݙو پاسہ تعاون تے گالھ مہاڑ

تہران ۔15جولائی (اے پی پی) وفاقی وزیر داخلہ محسن نقوی ایران دے صدر مسعود پزشکیان نال ہک اہم ملاقات کیتی اتے سانجھی دلچسپی دے معاملیاں، پاک-ایران تعلقات اتے ݙوپاسہ تعاون تے گالھ مہاڑ کیتی۔ وزارت داخلہ دے جاری بیان موجب وزیر داخلہ محسن نقوی ایرانی صدر مسعود پزشکیان کوں جنگ اچ عظیم فتح دی مبارخ ݙتی۔ وزیر داخلہ آکھیا جو ایران دے سپریم لیڈر سمیت پوری قوم جارحیت دا ڈٹ تے مقابلہ کیتا۔ محسن نقوی آکھیا جو ایرانی سپریم لیڈر آیت اللہ خامنہ ای دی دانشمندانہ قیادت اتے تہاݙی بہترین حکمت عملی جنگ اچ فیصلہ کن کردار ادا کیتا، جیڑھا جو امت مسلمہ سانگے باعث فخر اے۔ وزیر داخلہ آکھیا جو پاکستان ہر فورم تے ایران تے حملے دی پر زور مذمت کیتی۔ محسن نقوی آکھیا جو پاکستانی پارلیمنٹ ساریاں توں پہلے ایران تے جنگ مسلط کرݨ دے خلاف مذمتی قرارداد منظور کیتی اتے ایران دے آپݨے دفاع دے جائز حق دی حمایت کیتی۔ وزیر داخلہ محسن نقوی وزیر اعظم شہباز شریف ولوں ایرانی صدر مسعود پزشکیان کوں نیک خواہشات اتے احترام دا سنیھا پڄایا۔ ایرانی صدر مسعود پزشکیان  آکھیا جو پاکستان نال آپݨے تعلقات کوں انتہائی اہمیت ݙیندن۔ انہاں آکھیا جو پاکستان جنگ دے دوران جیڑھا ساتھ ݙتا او کݙاہیں نئیں بھل سڳدے۔ ایرانی صدر مسعود پزشکیان آکھیا جو صہیونی حکومت مسلم ملکاں وچال تقسیم اتے کمزوری پیدا کرݨ دی کوشش کریندی پئی اے، اسلامی ملکاں وچال اتحاد اتے ہم آہنگی ضروری اے۔ ایرانی صدر مسعود پزشکیان آکھیا جو مسلم حکومتاں اسلامی اتحاد دی اہمیت کوں پوری طرح سمجھ ونڄن تاں او صہیونی حکومت دے خلاف ہک متحد محاذ بݨا سڳدن۔ صدر مسعود پزشکیان ے ایران اتے پاکستان وچال موجودہ ݙوپاسہ تعلقات تے اطمینان کیتا۔ ایرانی صدر ݙوہاں ملکاں وچال جامع تعاون کوں وسیع کرݨ سانگے سفارتی تبادلیاں اتے تعمیری مکالمے دی اہمیت تے زور ݙتا۔ ایرانی صدر اسرائیلی مسلط کردہ جنگ اچ پاکستان دی مخلصانہ حمایت تے شکریہ ادا کیتا۔ انہاں آکھیا جو ݙوہاں ملکاں کول تعاون کوں ودھاوݨ دے بے پناہ موقعے موجود ہن۔ ایرانی وزیر داخلہ سکندر مومنی، ایرانی صدر دے معاون خصوصی، پاکستان اچ ایران دے سفیر، ایران اچ پاکستان دے سفیر وی ایں موقع تے موجود ہن۔