چیئرمین سینیٹ سید یوسف رضا گیلانی نال بین الپارلیمانی سپیکرز کانفرنس دے سیکرٹری جنرل دی ملاقات

اسلام آباد۔ 15 جولائی (اے پی پی) چیئرمین سینیٹ سید یوسف رضا گیلانی نال بین الپارلیمانی سپیکرز کانفرنس دے سیکرٹری جنرل اک ناتھ دھکل پارلیمنٹ ہاؤس وچ ملاقات کیتی۔ چیئرمین سینیٹ سید یوسف رضا گیلانی آئی ایس سی دے بانی چیئرمین وی ہن۔ سینیٹ سیکرٹریٹ دے مطابق، ملاقات وچ آئی ایس سی دے سیکرٹری جنرل چیئرمین سینیٹ نال نومبر وچ پاکستان وچ منعقد تھیوݨ آلی مجوزہ کانفرنس تے وی ڳالھ مہاڑ کیتی۔ چیئرمین سینیٹ و بانی چیئرمین آئی ایس سی سیکرٹری جنرل آئی ایس سی دے دورے کوں ٻہوں اہم قرار ݙتا۔چیئرمین سینیٹ و بانی چیئرمین آئی ایس سی آکھیا جو آئی ایس سی امن و ترقی دے ودھارے سانڳے کم کرݨ دا ہک اہم فورم ثابت تھیسی۔ جھیڑے تے ٻئے عالمی چیلنجز سارے ملکاں سانگے اوکھ پیدا کیتی اے ۔ مسئلیں دا رل تے سانجھی حکمت عملی دے ذریعے حل کڈھݨ ویلھے دی اہم لوڑھ اے۔ آئی ایس سی دے سیکرٹری جنرل سارے فورم دے ممبراں دی طرفوں سید یوسف رضا گیلانی دی قیادت تے بھرپور اعتماد دا اظہار کیتا۔ سیکرٹری جنرل آئی ایس سی آکھیا جو سید یوسف رضا گیلانی عالمی مقبولیت رکھیندن، آئی ایس سی انہاں دی قیادت وچ موثر انداز وچ کم کریسی۔ سیکرٹری جنرل آئی ایس سی چیئرمین سینیٹ و بانی چیئرمین آئی ایس سی کوں مستقبل دے لائحہ عمل  دا ݙسایا ۔ انہاں آکھیا جو آئی ایس سی آئی پی یو مبصر دی حیثیت نال شمولیت سانگے درخواست ݙتی اے، اقوام متحدہ نال وی رابطہ کاری کوں ودھارا ݙیسن۔