وفاقی وزیر داخلہ نال بیجنگ پولیس ڈیپارٹمنٹ دے وفد دی ملاقات

اسلام آباد۔ 16 جولائی (اے پی پی) وفاقی وزیر داخلہ محسن نقوی نال بیجنگ پولیس ڈیپارٹمنٹ دے وفد ملاقات کیتی اتے اسلام آباد پولیس اتے بیجنگ پولیس وچکار اشتراک کار ودھاوݨ تے تفصیلی ڳالھ مہاڑ کیتی ۔ وزارت داخلہ دی طرفوں جاری بیان موجب ، بیجنگ پولیس ڈیپارٹمنٹ دے وفد ڈپٹی ڈائریکٹر جنرل گاؤ جیانزن دی سربراہی وچ وزیر داخلہ محسن نقوی نال ملاقات کیتی۔ملاقات وچ فیصلہ کیتا ڳئے جو اسلام آباد پولیس دے افسراں کوں جدید پولیسنگ و ٹیکنالوجی دی تربیت سانڳے بیجنگ بھجوایا ویسی۔ ایں ڳالھ تے اتفاق تھئے جو اسلام آباد پولیس دے افسران بیجنگ پولیس ڈیپارٹمنٹ وچ تربیتی کورسز کریسن۔ ملاقات وچ فیصلہ کیتا ڳئے جو اسلام آباد پولیس دے افسران بیجنگ وچ پولیسنگ نظام دی بہتری سانڳے آرٹیفیشل انٹیلی جنس دی وی ٹریننگ گھنسن۔ وفاقی وزیر داخلہ محسن نقوی ایں موقع تے ڳالھ کریندے آکھیے جو بیجنگ وچ جدید تربیت نال اسلام آباد پولیس دی استعداد کار وچ ودھارا تھیسی اسلام آباد پولیس اتے بیجنگ پولیس ڈیپارٹمنٹس ہک ݙوجھے دے تجربیں توں بھرپور فیدہ چا سڳدن۔وزیر داخلہ آکھیا جو بیجنگ پولیس ہک ٻہوں فعال اتے جدید ٹیکنالوجی نال لیس فورس اے، امن عامہ اتے جرائم دی سرکوبی وچ جدید ٹیکنالوجی دے استعمال وچ بیجنگ پولیس دا تعاون اسلام آباد پولیس سانڳے ٻہوں فیدہ مند ثابت تھیسی ۔ محسن نقوی آکھیا جو بیجنگ پولیس دی طرفوں اسلام آباد پولیس کوں اینٹی رائٹ وچ وی تربیت ݙیوݨ دا خیر مقدم کریسوں۔ دہشت گردی، منظم جرائم، منشیات اتے انسانی سمگلنگ نال نبݨݨ سانڳے معلومات دا وختی تبادلہ اہمیت رکھیندے۔ وزیر داخلہ محسن نقوی اسلام آباد پولیس دے نال اشتراک کار ودھاوݨ تے بیجنگ پولیس ڈیپارٹمنٹ دے وفد دا شکریہ ادا کیتا۔ وفد وچ چین دی وزارت پبلک سکیورٹی دے ڈپٹی ڈائریکٹر جنرل لی یو ہانگ اتے بیجنگ پولیس ڈیپارٹمنٹ دے ڈائریکٹرز ہی ژن، فینگ وی اتے ہو جمن شامل ہن۔ ایں موقع تے وزیر مملکت داخلہ طلال چوہدری، وفاقی سیکرٹری داخلہ، ڈی جی ایف آئی اے، کمانڈنٹ نیشنل پولیس اکیڈمی، چیف کمشنر اسلام آباد، آئی جی اسلام آباد پولیس اتے ڈی سی اسلام آباد وی موجود ہن۔