وفاقی کابینہ “ای او بی آئی” پنشن وچ 15 فیصد ودھارے، کینسر، دل دے امراض دیاں اتے زندگی بچاوݨ آلیاں دوائیں دی درآمد تے مزید پنج سال استثنا دی منظوری ݙے ݙتی

اسلام آباد۔ 16 جولائی (اے پی پی) وفاقی کابینہ ہک جنوری 2025 توں “ای او بی آئی” دی پنشن وچ 15 فیصد ودھارے اتے کینسر، دل دے امراض اتے زندگی بچاوݨ آلیاں دوائیں دی درآمد تے مزید پنج سال استثنا دی منظوری ݙے ݙتی۔ وزیراعظم دفتر دے میڈیا ونگ توں جاری بیان موجب ، وزیراعظم محمد شہباز شریف دی صدارت اچ وفاقی کابینہ دا اجلاس تھیا۔وفاقی کابینہ وزارت بحری امور دی سفارش تے سی کیرج شپنگ ڈاکومنٹس ٻل 2025 دے مسودے دے حوالے نال ضروری قانونی کارروائی شروع کرݨ دی منظوری ݙتی۔ وفاقی کابینہ سمندر پار پاکستانیز و انسانی وسائل دی ترقی دی وزارت دی سفارش تے ایمپلائز اولڈ ایج بینیفٹس انسٹیٹیوشن (ای او بی آئی) دی پنشن وچ 15 فیصد ودھارے دی منظوری ݙے ݙتی جیں دا اطلاق ہک جنوری 2025 توں تھیسی ۔ پنشن وچ اے ودھارا ادارہ اپݨے وسائل توں ݙیسی۔ وزیراعظم ای او بی آئی وچ ادارہ جاتی اصلاحات دے حوالے نال کابینہ دی کمیٹی تشکیل ݙیوݨ دی ہدایت کیتی۔ کمیٹی ادارے وچ اصلاحات توں علاوہ غیر منظم لیبر سیکٹر جیویں جو گھریلو، کاشتکاری نال جڑیے ملازمین اتے ایں طرح دے ݙوجھے شعبیں دے ملازمین جنہاں کوں ہݨ تئیں نظر انداز کیتا ویندا رہیے، کوں اولڈ ایج بینیفٹس ݙیوݨ دے حوالے نال تجویزاں تے غور کریسی۔ غیر منظم سیکٹر دیاں اصلاحات نال ہݨ تئیں نظر انداز تھیوݨ آلے ملازمین کوں انہاں دے حقوق ملسن۔وفاقی کابینہ وزارت قومی صحت دی سفارش تے ہسپتالاں اتے صحت دے متعلقہ اداریں وچ استعمال تھیوݨ آلے کینسر، دل دے امراض اتے زندگی بچاوݨ آلیاں دوائیں دی درآمد تے 5 سال سانڳے مزید استثنا دی منظوری ݙے ݙتی۔ اے دوائیں انسانی زندگی کوں بچاوݨ سانڳے ٻہوں اہم ہن اتے انہاں دی وختی دستیابی دی لوڑھ کوں سامݨے رکھیندے اے استثنا ݙتا ڳئے۔ اے ادوائیں صرف ہسپتالاں اتے متعلقہ اداریں وچ دستیاب ہوسن اتے انہاں دی کھلے عام وکری تے پابندی ہوسی اتے انہاں دوائیں دی درآمد سانڳے پہلے لائسنسنگ اتھارٹی توں منظوری درکار ہوسی۔ وفاقی کابینہ کابینہ کمیٹی برائے لیجسلیٹو کیسز دے 2 اتے 3 جولائی 2025 دے اجلاس وچ کیتے ڳئے فیصلیں دی توثیق کر ݙتی۔