شیان۔ 16 جولائی (اے پی پی) وفاقی سیکرٹری وزارت اطلاعات و نشریات عنبرین جان چین دے شہر شیان وچ شنگھائی تعاون تنظیم ملکاں دے ݙوجھے ٹیلی ویژن فیسٹیول دی افتتاحی تقریب وچ بطور “مہمان اعزاز” شرکت کیتی۔ وفاقی سیکرٹری عنبرین جان ایں موقع تے صدر مملکت آصف علی زرداری دی طرفوں مبارخ باد دا پیغام پڑھ تے سݨایا۔اپݨے پیغام وچ صدر مملکت آصف علی زرداری حکومت پاکستان اتے اپݨی طرفوں فیسٹیول دے کامیاب انعقاد تے دلی مبارخ باد پیش کریندے آکھیا جو اے متحرک اقدام شنگھائی تعاون تنظیم دے رکن ملکاں وچکار ثقافت اتے میڈیا دے شعبیں وچ پائیدار تعاون دا ثبوت اے۔ اے عوامی سطح تے رابطیں کوں ودھارا ݙیوݨ، سانجھے ثقافتی ورثے کوں اجاگر کرݨ اتے سمعی و بصری اظہار دے طاقتور ذریعے نال متنوع تہذیباں وچ سانجھی افہام و تفہیم اتے احترام کوں ودھارا ݙیوݨ وچ اہم کردار دا حامل اے۔ انہاں آکھیا جو فیسٹیول دا موضوع “شنگھائی سپرٹ” دے بنیادی اصولاں نال ہم آہنگ اے جیڑھا جوسانجھے اعتماد و مفاد، مساوات، مشاورت، متنوع ثقافتاں دے احترام اتے سانجھی ترقی کوں ودھارا ݙیندے ۔ اے اقدار ایں تقریب وچ واضح طور تے ݙسدیاں پئن جو ساݙیاں قوماں دے سانجھے تعلقات کوں تقویت ݙیندن۔صدر پاکستان دے پیغام وچ آکھیا ڳئے جو شنگھائی تعاون تنظیم پاکستان سانڳے ٻہوں اہمیت رکھیندی اے جیڑھی جو علاقائی امن، اقتصادی ہم آہنگی اتے تزویراتی تعاون کوں اڳوں ودھاوݨ سانڳے ہک اہم پلیٹ فارم دے طور تے کم کریندی پئی اے۔ انہاں آکھیا جو پاکستان شنگھائی تعاون تنظیم دیاں متنوع کمیونٹیز وچکار سانجھی افہام و تفہیم، ثقافتی پذیرائی اتے اعتماد کوں ودھارا ݙیوݨ سانڳے عوامی سطح تے تعلقات کوں ودھارا ݙیوݨ تے ٻہوں زور ݙیندے۔ انہاں فیسٹیول کوں شاندار کامیابی نال ہمکنار کرݨ تے منتظمین کوں خراج تحسین پیش کیتا۔
