اسلام آباد (اے پی پی) وفاقی وزیر قومی صحت سید مصطفیٰ کمال آکھیے جو صحت دے نظام کوں تکڑا بݨاوݨ کیتے علاج توں ودھ احتیاط اتے حفاظتی اقدامات تے توجہ ݙتی ویندی پئی اے، جݙاں جو پرائمری ہیلتھ کیئر نظام کوں تکڑا کرتے تریجھے درجے دے ہسپتالاں تے ٻوجھ گھٹ کیتا ویندا پئے۔اے ڳالھ انہاں برطانوی ہائی کمیشن دے قائم مقام ہائی کمشنر اتے ڈائریکٹر ترقی نال ملاقات اچ آکھی ۔ قائم مقام برطانوی ہائی کمشنر برطانوی حکومت دے تعاون نال صحت دے شعبے اچ جاری پروجیکٹ بارے وی ݙسایا۔ وفاقی وزیر صحت ، صحت اتے آبادی دے شعبیں اچ برطانیہ ولوں جاری تعاون تے شکریہ ادا کیتا۔مصطفیٰ کمال پاکستان کوں پیش آندے صحت دے چیلنجز، متعدی اتے غیر متعدی بیماریاں دے ٻوجھ تے روشنی پاتی۔ انہاں آکھیا جو صحت دے نظام کوں تکڑا بݨاوݨ کیتے علاج توں ودھ احتیاط اتے حفاظتی اقدامات تے توجہ ݙتی ویندی پئی اے، پرائمری ہیلتھ کیئر نظام کوں تکڑا کرتے تریجھے درجے دے ہسپتالاں تے ٻوجھ گھٹ کیتا ویندا پئے۔انہاں آکھیا جو پاکستان اچ تکھے ودھݨ آلی آبادی ہک قومی مسئلہ اے۔ ملک اچ 68 فیصد بیماریاں دی وجہ آلودہ پاݨی اے۔ انہاں آکھیا جو وزیراعظم آبادی اچ ودھارے کوں روکݨ کیتے نیشنل ٹاسک فورس بݨائی اے۔ قائم مقام برٹش ہائی کمشنر آبادی اچ کمی گھن آوݨ کیتے جاری اقدامات اتے کوششاں دی تعریف کیتی ۔ برطانوی حکومت پاکستان دے صحت اتے آبادی دے شعبیں اچ آپݨی معاونت جاری رکھیسی۔
