وفاقی وزیر داخلہ وزارت دے سارے ذیلی اداریاں توں سروس ڈلیوری دی بہتری اتے چنگے نتائج کیتے جامع پلان منگ ڳھدے

اسلام آباد۔18جولائی  (اے پی پی) وفاقی وزارت داخلہ سارے ذیلی اداریاں وچال کوآرڈینیشن ودھاوݨ دا فیصلہ کر ڳھدے، وزیر داخلہ محسن نقوی انہاں اداریاں توں سروس ڈلیوری دی بہتری اتے چنگے نتائج ڳھنݨ بارے جامع پلان منگ ڳھدے۔ وزارت داخلہ توں جاری بیان موجب اے ہدایات وزیر داخلہ محسن نقوی آپݨی صدارت اچ خصوصی اجلاس اچ جاری کیتی جئیں اچ سارے ذیلی اداریاں دے سربراہان اتے متعلقہ اعلیٰ حکام شرکت کیتی۔ وفاقی وزیر داخلہ وزارت دے سارے ذیلی اداریاں کوں ترائے ݙینھ اچ قواعد و ضوابط اچ تبدیلی اتے ضروری سفارشات پیش کرݨ دی ہدایت کر ݙتی۔ انہاں وفاقی سیکرٹری داخلہ کوں ہدایت کیتی جو ایں بارے حتمی پلان پیش کیتا ونجے۔ وزیر داخلہ آکھیا جو ذیلی اداریاں وچال کوآرڈینیشن دا فقدان اے جئیں کوں ہنگامی بنیاداں تے بہتر بݨاوݨے۔ محسن نقوی آکھیا جو کارکردگی کوں ٻیا بہتر تے موثر بݨاوݨ کیتے سارے ذیلی اداریاں اچ مربوط ہم آہنگی و اشتراک کار ودھاوݨ دی لوڑھ اے، ہر ادارے دی ضرورتاں اتے دستیاب وسائل دی تفصیلات واضع کیتی ونڄن اتے ہر ادارہ ݙوجھے اداریاں دی معاونت دے طریقہ کار بارے ٹھوس پلان ٻݨاوے۔ وزیر داخلہ آکھیا جو سارے ذیلی اداریاں اچ موثر روابط و ہم آہنگی نال فائدہ عوام کوں ہوسی، ہک ݙوجھے دیاں صلاحیتاں توں بھرپور فائدہ چا کر ہی اداریاں دی استعداد کار ودھائی ونڄ سڳدی ہے۔ اجلاس اچ وزیر مملکت برائے داخلہ طلال چوہدری، سیکرٹری داخلہ، ایڈیشنل سیکرٹریز، ڈی جی ایف آئی اے، کمانڈنٹ فیڈرل کانسٹیبلری، کمانڈنٹ نیشنل پولیس اکیڈمی، ڈی جی نیشنل پولیس بیورو، ڈی جی پاسپورٹ اینڈ امیگریشن، ڈی جی نیشنل سائبر کرائم انویسٹی گیشن ایجنسی، ڈی جی نیشنل فرانزک ایجنسی، چیف کمشنر اسلام آباد، آئی جی اسلام آباد پولیس، ڈی سی اسلام آباد، چیف آپریٹنگ آفیسر نادرا اتے ڈائریکٹر اینٹی نارکوٹکس فورس شرکت کیتی۔