وزیراعظم شہباز شریف دا چین اچ 300 پاکستانی گریجوایٹس دی زرعی تربیت مکمل تھیوݨ تے مسرت دا اظہار

اسلام آباد۔18جولائی  (اے پی پی)وزیراعظم محمد شہباز شریف چین اچ 300 پاکستانی گریجوایٹس دی زرعی تربیت مکمل تھیوݨ تے خوشی دا اظہار کریندیں ہوئیں آکھیا جو اے ہک ہزار پاکستانی ایگری گریجوایٹس کوں چین اچ زراعت اتے لائیو سٹاک دے شعبیاں اچ جدید اتے عملی تربیت ݙیوݨ دے سلسلے دی کڑی اے جئیں دا آغاز جون 2024 اچ انہاں دے دورہ چین اچ تھیا ہا۔ جمہ کوں سوشل میڈیا ویب سائٹ “ایکس” تے آپݨی پوسٹ اچ وزیراعظم آکھیا جو انہاں کوں اے ڄاݨ تے ٻہوں خوشی تھیندی پئی اے جو 300 پاکستانی گریجوایٹس چین دے صوبے شان ژی اچ گھٹ پاݨی دے استعمال نال آبپاشی، بجاں دی پیداوار، زناوراں دی افزائش نسل، زرعی پیداوار ودھاوݨ اتے فصل چاوݨ دے بعد تھیوݨ آلے نقصانات توں بچاوݨ سودھے زراعت تے لائیو سٹاک دے اہم شعبیاں اچ تربیت مکمل کر ڳھدی اے۔ وزیراعظم ایں بارے تعاون تے چینی قیادت، شان ژی دی حکومت اتے اوتھاں دی ݙو یونیورسٹیاں دا وی شکریہ ادا کیتا جتھ پاکستانی گریجوایٹس کوں تربیت ݙتی ویندی پئی اے۔ وزیراعظم قومی غذائی تحفظ دی وزارت، ہائیر ایجوکیشن کمیشن اتے بیجنگ اچ پاکستانی سفارت خانے دے کردار کوں وی سراہیا جنہاں ایں اقدام کوں عملی جامہ پواوݨ کیتے محنت کیتی۔ واضح راہوے جو جون 2024 اچ وزیراعظم دے دورہ چین اچ ہک ہزار پاکستانیاں کوں زراعت تے لائیو سٹاک دے شعبیاں اچ جدت دی عملی تربیت کیتے چین بھیجݨ دا فیصلہ تھیا ہا۔