شپنگ سیکٹر اچ نجی شعبے دی سرمایہ کاری دی حوصلہ افزائی کیتے پلان ٻݨایا ونڄے، وزیراعظم شہباز شریف

اسلام آباد۔18جولائی  (اے پی پی)وزیراعظم محمد شہباز شریف نیشنل شپنگ کارپوریشن کوں کارپوریٹ بنیاداں تے استوار کرݨ کیتے اقدامات کرݨ دی ہدایت کریندیں ہوئیں آکھیا جو ٹرانزٹ ٹریڈ کیتے ریلوے اتے شپنگ شعبے دی بہتری کلیدی اہمیت رکھیندی اے۔ وزیراعظم آفس دے میڈیا ونگ ولوں جاری بیان موجب وزیراعظم محمد شہباز شریف دی صدارت اچ پاکستان دے شپنگ سیکٹر اتے پاکستان نیشنل شپنگ کارپوریشن دی اصلاحات بارے جائزہ اجلاس جمے کوں تھیا۔ اجلاس اچ نائب وزیراعظم تے وزیر خارجہ محمد اسحاق ڈار، وفاقی وزراء احد خان چیمہ، جنید انوار چوہدری اتے متعلقہ اعلیٰ حکام شرکت کیتی۔ وزیراعظم ہدایت کیتی جو پاکستان دے شپنگ سیکٹر اچ نجی شعبے دی سرمایہ کاری دی حوصلہ افزائی کیتے پلان ٻݨایا ونجے، پاکستان، افغانستان، ازبکستان ریلوے لائن نال خطے اچ تجارت دے نویں دور دا آغاز تھیوݨ ویندا پئے۔ انہاں آکھیا جو وسطی ایشیا توں تجارتی سامان دی پاکستانی بندرگاہیں دے ذریعے پوری دنیا اچ آمد و رفت ہوسی۔ اے پاکستانی شپنگ لائنز کیتے سامان دی ترسیل نال ملک کیتے قیمتی زر مبادلہ کماوݨ دا ہک نادر موقع اے۔ وزیراعظم ہدایت کیتی جو پاکستان دے فریٹ دی مد اچ خرچ تھیوݨ آلے زر مبادلہ دی بچت کیتے بحری بیڑے اچ جہازاں دی تعداد اچ ودھارے کیتے اقدامات کیتے ونڄن۔ انہاں وزارت سمندری امور اتے پاکستان نیشنل شپنگ کارپوریشن کوں شعبے دی نویں سروں اصلاحات اتے پائیدار بزنس ماڈل پیش کرݨ دی ہدایت کیتی۔