وزارت مذہبی امور زائرین دے تحفظ اتے سہولت کیتے جدید آن لائن سسٹم متعارف کرا ݙتے، سردار محمد یوسف

اسلام آباد (اے پی پی) وفاقی وزیر مذہبی امور و بین المذاہب ہم آہنگی سردار محمد یوسف آکھیے جو وزارت مذہبی امور زائرین دے تحفظ اتے سہولت کیتے ہک جدید آن لائن سسٹم متعارف کرا ݙتے جتھاں زائر اتے گروپ آرگنائزر کوں QR کوڈ آلا ای-کارڈ جاری کیتا ویندا پئے۔ ایں اقدام نال اہل خانہ اتے حکومت کوں ہر مسافر اتے زائر دی وختی معلومات میسر آسن۔ وزارت مذہبی امور موجب آپݨے ہک بیان اچ انہاں آکھیا جو ایران، عراق اتے شام دے حکام دے نال مسافراں اتے زائرین دیاں فہرستاں وختی شیئر تھیسن، ایں اقدام نال کہیں وی قسم دی غلط فہمی یا پروپیگنڈا دی گنجائش ختم تھی ویسی۔ وفاقی وزیر مذہبی امور سارے ٹور آپریٹرز اتے زائرین توں اپیل کیتی اے جو 31 اگست 2025 تئیں آپݨیاں تفصیلات اساݙے پورٹل تے درج کرن تاں جو کسی وی شہری دا ناں “نامکمل فہرست” اچ نہ رہوے۔انہاں آکھیا جو اساݙا مقصد ہر پاکستانی دے سفر کوں محفوظ بݨاوݨ اے، بے بنیاد قیاس آرائیاں روکݨ اتے غلط تاثر زائل کرݨ کیتے میڈیا اتے سول سوسائٹی توں وی تعاون دی درخواست اے۔ سردار محمد یوسف آکھیا جو حکومت پاکستان ٻاہرلے ملک سفر کرݨ آلے شہریاں دی فلاح کوں پہلی ترجیح ݙیندی اے، آؤ، رل تے ایں ڈیجیٹل نظام کوں کامیاب بݨاؤں، آوݨ آلی دنیا کوں اے باور کراوݨ جو ریکارڈ شفاف اے اتے پاکستان ذمے وارانہ نگرانی کیتے جدید ٹیکنالوجی دا استعمال کریندا پئے۔انہاں آکھیا جو گزریل ݙینھ میݙی ڳالھ مہاڑ اچ “40 ہزار” زائرین دا جو حوالہ ݙتا ڳیا ہئی ایں دا مقصد ہرگز اے تاثر ݙیوݨ نہ ہئی جو ہزاراں پاکستانی ٻاہرلےِ ملک لاپتہ ہن، اصل معاملہ اے ہے جو پراݨے کاغذی ریکارڈ ہݨ تئیں اساݙی مرکزی ڈیجیٹل رجسٹری اچ مکمل طور تے منتقل نہ تھی سڳئے ہن۔