یوم الحاق تاریخ دی او روشن سویل اے جݙاں اہلِ کشمیر ڈوگرا راج دے جبر کوں مسترد کرتے پاکستان کوں اپݨی سیاسی اَتے روحانی منزل قرار ݙتا، وزیر داخلہ محسن نقوی

اسلام آباد۔ 19 جولائی (اے پی پی) وفاقی وزیر داخلہ محسن نقوی آکھیے جو یوم الحاق پاکستان تاریخ دی او روشن سویل اے جݙاں اہلِ کشمیر ݙوگرا راج دے جبر کوں مسترد کر تے پاکستان کوں اپݨی سیاسی اَتے روحانی منزل قرار ݙتا، 19 جولائی 1947 کوں کشمیریاں ہک ایجھا فیصلہ کیتا جو ویلھے دی گرد، ظلم دی دھند اَتے بندوقاں دی گونج وچ وی نہ مٹ سڳیا۔ یوم الحاق پاکستان دے موقع تے وزیر داخلہ اپݨے پیغام وچ آکھیا جو قائداعظم محمد علی جناح دا فرمان اے جو “کشمیر پاکستان دی شہ رڳ اے” اِیہ اڄ وی ساݙے قومی شعور دا مرکز اے، کشمیر دیاں فضاواں وچ اڄ وی اوہو صدائے یقین گونجدی پئی اے جیں کوں 1947 دے غیر مسلح مگر غیرت مند کشمیریاں اچا کیتا ہئی۔محسن نقوی آکھیا جو بھارتی ریاست دا فوجی جبر، کالے قوانین اَتے انسانی حقوق دی پامالی کشمیریاں دی وفا کوں نہ بھن سڳے نہ جھکا سڳیے، یوم الحاق پاکستان تے شہداء کوں سلام پیش کریندوں جنہاں پاکستان نال نظریاتی نسبت کوں زندگی توں ودھ عزیز سمجھیا۔ انہاں آکھیا جو اقوام متحدہ دیاں قرارداداں اڄ وی منتظر ہن جو عالمی ضمیر جاڳے اَتے کشمیراں کوں انہاں دا جائز حق خودارادیت ݙتا ونڄے، حریت رہنماواں کوں جیلاں وچ پاتے ، زباناں کوں بند کرتے اَتے قبراں کھٹ تے وی بھارت کشمیریاں دے دل توں پاکستان نئیں کݙھ سڳدا۔وزیر داخلہ آکھیا جو یوم الحاق پاکستان عالمی برادری کیتے آئینہ اے جیں وچ ایں کوں اپݨی خاموشی، بے حسی اَتے ݙوڑے معیار دا چہرہ صاف ݙسݨا چاہیدے، یوم الحاق پاکستان تجدید عہد دا ݙینھ اے جو کشمیریاں دیاں قربانیاں اساں ساریاں تے امانت ہن جنہاں دا قرض صرف آزادی اے۔ محسن نقوی آکھیا جو انشاءاللہ او لمحہ پرے کائنی جݙاں بھارت کوں کشمیریاں دے جائز حق دے سامݨے سر تسلیم خم کرݨا پوسی، کشمیراں دی تحریک آزادی وچ پاکستان اپݨے بھراواں دی سفارتی، اخلاقی اَتے سیاسی حمایت جاری رکھیسی