اسلام آباد (اے پی پی) نائب وزیراعظم / وزیر خارجہ سینیٹر محمد اسحاق ڈار نیویارک اچ پاکستان دی اقوام متحدہ دی سلامتی کونسل (یو این ایس سی) دی صدارت سنبھالݨ دے اعلیٰ سطحی پروگراماں اچ شرکت دے نال نال ݙوجھیاں مصروفیات کیتے آندے ہفتے امریکہ دا دورہ کریسن۔ترجمان دفتر خارجہ موجب آپݨے دورہ دے دوران نیویارک اچ، پاکستان دی سلامتی کونسل دی صدارت سنبھالݨ دے حوالے نال دستخط کرݨ دی …
نائب وزیراعظم / وزیرخارجہ سینیٹرمحمداسحاق ڈار پاکستان دی سلامتی کونسل دی صدارت سنبھالݨ دی اعلیٰ سطحی دستخطی تقریبات اچ شرکت کیتے آندے ہفتے امریکہ ویسن
اسلام آباد (اے پی پی) نائب وزیراعظم / وزیر خارجہ سینیٹر محمد اسحاق ڈار نیویارک اچ پاکستان دی اقوام متحدہ دی سلامتی کونسل (یو این ایس سی) دی صدارت سنبھالݨ دے اعلیٰ سطحی پروگراماں اچ شرکت دے نال نال ݙوجھیاں مصروفیات کیتے آندے ہفتے امریکہ دا دورہ کریسن۔ترجمان دفتر خارجہ موجب آپݨے دورہ دے دوران نیویارک اچ، پاکستان دی سلامتی کونسل دی صدارت سنبھالݨ دے حوالے نال دستخط کرݨ دی تقریب اچ شرکت دے نال ہک اعلیٰ سطحی مباحثے دی صدارت کریسن جیں اچ “کثیر الجہتی دے ذریعے بین الاقوامی امن اتے سلامتی کوں ودھاوا ݙیوݨ اتے جھیڑیں دے پرامن حل” تے ڳالھ مہاڑ کیتی ویسی۔ اعلیٰ سطحی مباحثے دا مقصد کثیر الجہتی دے استحکام دے طریقے ڳولݨ اتے جھیڑے دے پرامن حل کیتے سفارت کاری اتے ثالثی کوں ودھاوݨ اے۔ایں توں انڄ ، نائب وزیراعظم / وزیر خارجہ سینیٹر محمد اسحاق ڈار “مشرق وسطیٰ دی صورتحال، فلسطین دا سوال” دے موضوع تے سلامتی کونسل دے سہ ماہی مباحثے دی صدارت کریسن۔ سینیٹر محمد اسحاق ڈار اقوام متحدہ دی سلامتی کونسل دی ہک اعلیٰ سطحی بریفنگ دی وی صدارت کریسن جیں اچ اقوام متحدہ اتے اسلامی تعاون تنظیم (او آئی سی) دے درمیان تعاون ودھاوݨ تے توجہ مرکوز کیتی ویسی۔ اے اجلاس بین الاقوامی امن اتے سلامتی دے قیام کیتے او آئی سی اتے اقوام متحدہ وچال تعاون کوں تکڑا بݨاوݨ کیتے پاکستان دیاں کوششاں دے ہک حصے دے طور تے منعقد کیتا ویندا پئے۔دفتر خارجہ موجب فلسطینی عوام دے حق خود ارادیت کیتے پاکستان دے تکڑے عزم اتے غیر متزلزل حمایت دے اظہار کیتے نائب وزیراعظم و وزیر خارجہ “مسئلہ فلسطین دے سوال دے پرامن حل اتے ݙو ریاستی حل دے نفاذ” دے موضوع تے اعلیٰ سطحی کانفرنس اچ وی شرکت کریسن۔ نیویارک اچ آپݨے قیام دے دوران محمد اسحاق ڈار دی آپݨے ہم منصباں دے نال نال اقوام متحدہ دے سینئر حکام دے نال وی ملاقاتاں متوقع ہن۔نائب وزیراعظم/وزیرخارجہ سینیٹر محمد اسحاق ڈار دا نیویارک اتے واشنگٹن دا دورہ کثیر الجہتی کیتے پاکستان دے ودھدے کردار اتے اہمیت دے نال نال امریکہ دے نال ودھدے کثیر الجہتی تعلقات دی مثال اے۔ ایں توں انڄ اقوام متحدہ دی سلامتی کونسل دے مشرق وسطیٰ تے سہ ماہی مباحثے دے نال نال “مسئلہ فلسطین دے سوال دا پرامن اتے ݙو ریاستی حل دے نفاذ” دے موضوع تے بین الاقوامی کانفرنس اچ پاکستان دی اعلیٰ سطحی شرکت وی فلسطینی کاز کیتے پاکستان دے غیر متزلزل عزم اتے حمایت دا منہ ٻولیندا ثبوت اے۔
